die 6. stund der Planeten verborgen.
Der dritt Quadrant mach wie vor / vnd suoch des 6. theyl oder puncten / eim yeden sein centrum auff der linien a b / oder a c / vff welche seiten du die bünlen machen wilt / vnd zeüch sye auß dem puncten a zuosamen / vnd beschreib dann die vngleichen oder planeten stund / wie du sychst in der vorgemachten figur / du magst auch wol die vngleichen stund im ♑ eynfallen lassen / vnd nit gar zuom puncten a lassen kommen / von wegen das die obern kleynen stund linien / dester baß moegen raum haben. Nu du gesuocht hast wie vor / zuom ersten quadranten gelernt ist die circkel der 12. zeychen / vnd hast darnach gesuocht die 6. gleiche teyl der planeten stunden / vnd sye gezogen / als dann suoch die hoehe der sonnen vmb 12. im ♋ / vnd die hoehe im ♑ auch vmb 12. die verzeychne mit puncten vnd leg die regel vff zwen puncten zuo 12. vnd in yeder stund im ♋ vnd ♑ / vnd zeüch gerade linien zuosamen / so geben sye die die stunden / wie angezeygt ist.
Darnach so du die kleynen obern stund linien inn den Quadranten machen wilt / so suoch durch blind rissz die 6. stund der planeten / darauff die andern ersuocht muesszen werden / wie an andern orten gelernet ist / darnach suoch die hoehe der sonnen / wie zuouor im ♋ und ♎ vnd ♈ und ♑ / vnd der dreyer puncten centrum / vnd zeüchs zuosamen / vnd beschreib die stunden darein / wie dir vorgestelt ist / deß gleichen mit den zeychen vnd graden der zeychen / vnd die bünlin vnd berlin / etc.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 63. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_63.jpg&oldid=- (Version vom 31.7.2018)
