Ein Stättlein im Hegöw / vnd der Landgrafschafft Nellenburg / oberhalb Engen / gegen dem Bodensee / vnnd auff einem runden Berg / gar lustig gelegen; allda / zu Friedenszeiten / sich vor diesem / etliche vom Adel auffgehalten / vnd daselbst / wie Laterus de Censu, p. 1057. schreibet / im Jahr 1604. die Juden / auß Befelch H. Ertzhertzogs Maximilians von Oesterreich / verjagt worden seyn.
Ein Schloß zwischen Vlm / vnnd Bibrach / von jedem Orth / wie Crusius berichtet / 3. Stundt gelegen. Ist aber näher bey Vlm / als Bibrach / vnd hat den Herren von Freyberg lange Zeit gehört: Nach dem aber / vor etlichen Jahren / Herr Philipp Eduard / Freyherr von Freyberg / noch ledig Stands / durch ein Pferdt / vmb sein Leben kommen; So ist / wegen seiner Verlassenschafft / zwischen dessen vier Frawen Schwestern / als Herrn Graf Berchtolds von Wolckenstein / O. O. Regiments Praesidenten zu Augspurg / etc. vnd Herrn Maximilian Trappen / Freyherrens / etc. Gemahlinen / auf einer; vnd den beyden Geistlichen Fr. Schwestern / deren eine zu Costantz / vnnd die andere im Closter zu Rorschach sich befunden / auff der andern Seiten / Strittigkeit vorgefallen. Es ist aber dieser letztern / am Käyserlichen Hof / auch gleiche Erbsportion / zugesprochen / vnnd deßwegen zu Commissarien / der Herr Praelat zu Ochsenhausen / vnnd die Statt Vlm / ernannt worden; die auch / im Herbstmonat[1] / An. 1651. die würckliche immission vorgenommen haben.
Oder Madelbergense monasterium, ein Weyland Praemonstratenser Closter / zwischen Hohenstauffen vnd Schorndorff / vnd von jedem Orth ein Meil Wegs gelegen / welches im Jahr 1181. Volknand / ein Freyherr von Ebersperg / für graue Brüder / gestifftet hat. Der erste Probst Ulricus, ist Anno 1216. gestorben. Vnd hat solches Closter / biß auffs Jahr 1423. Pröbste; hernach bekam es Aebbte / vnnd ist heutiges Tags / vnter dem Hertzogen von Würtemberg. Anno 1525. haben dieses GottsHauß die Auffrührischen Bauren angezündet / vnd biß auff S. Vlrichs Kirchen verbrant; so aber Leonhart Dyrrh / der Rechten Doctor / vnd Abbt allhie / der Anno 1538. gestorben / wieder auffgebawet hat.
Ein Schloß / vnnd grosses Dorff / beym Kocher / zwischen der Limpurg-Gaildorffischen Herrschafft / vnd dem Stifft Elwang / gelegen / vnd den Junckern Adelmannen von Hohenstatt (so auch ein Schloß ist /) vnd Adelmansfelden / gehörig / allda man allerhand Silberzeug machen solle.
Insgemein Ahusen / ein Benedictiner Closter / im Brentzthal / vnnd an der Brentz (welches Wasser niemals / auch im dem strengen Winter / gefrieret) gelegen / so Anfangs Graf Mangold von Tübingen / im Dorff Langenau / so jetzt Vlmischer Herrschaft / vmbs Jahr 1125. gestifftet / vnd hernach seine Söhne / von dannen / an diesen Ort gesetzt haben. Der erste Abbt hieß Siegefried. Theils setzen die Stifftung ins 1135. Jahr: Aber die obere Meynung wird für besser gehalten. Die Aebbte allda setzet Carolus Stengelius, in Mantissa ad Commentar. R. A. V. cap. 23. vnder denen er selbst einer gewesen / An. 1630. erwöhlt; nach dem solches Closter den Römisch Catholischen damaln worden; wiewol es hernach / vermög im Jahr 48. auffgerichten General Frieden-Schlusses /
- ↑ Vorlage: Herstb- ...
Matthäus Merian: Topographia Sueviae. Frankfurt am Mayn: Frankfurter Kunstverein, 1643/1656 (Faksimilenachdruck 1925), Seite 4. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_013.jpg&oldid=- (Version vom 31.7.2018)
