auch wider den NierenSande; vnd soll sonderlich es den Weibern nutzlich seyn / vnnd sie fruchtbar machen. Siehe obernandten Crusium part. 2. Annal. lib. 9. c. 13. Gregorium Saltzmann / von aller Wildbäder Natur / p. 35. vnnd Martinum Rulandum von Wassern vnd Bädern / lib. 1. part. 1. p. 58. welcher letzte auch sagt / daß die Wasser zu Talfingen / vnd Gastein / so mit sauren Berggeel vermischt seyn / die Dunckelheit der Augen benehmen / das Gesicht wieder zurecht bringen / vnd es erhalten. So will Bauhinus, daß das Salniter Wasser zu Talfingen die Taubheit benehme / auch die Harnwinde vertreibe / vnd für die Schmertzen der Mutter seye. Vnd ist solches schon vor vielen Jaren entstanden / wie dann allbereyt An. 1475. Paul Rott / Burger zu Vlm / dem Hansen Sybolten / auch Burger daselbst / dises Bad / mit sampt dem Gesundbrunnen / Hauß / Hofraitin / Capell / dem grossen Baumgarten / vnd dem kleinen / darinn der genant Gesundbrunn entspringt / auch das Burgstall / vnnd den Berg / wie der mit den Wegen vmbgriffen / Item / das Höltzlein ob dem Tobel / ob dem grossen Baumgarten / vmb fünffhundert Gulden / Rheinisch / verkaufft hat. Vnterhalb dieses Bads / in dem Thal / an dem Wasser / ligt das Dorff VnderTalfingen / so in das Closter Elchingen gehörig / aber vnder Vlmischer hohen Obrigkeit ist; dadurch ein vnbenambstes Wässerlein fliesset / so die beyde Bistümber Augspurg / vnd Costantz / von einander scheydet; wie Carolus Stengelius, part. 2. Rer. August. Vindel. c. 33. pag. 165. berichtet; der auch von den Kräfften deß besagten Dalfinger Bads / an selbigem Ort / handelt.
Ein Stättlein / ein geringe Meil gegen Argen / vom BodenSee / hindan / vnnd jenseit dem Eichwald / an einem lustigen fruchtbaren Orth / gelegen; allda es vor dem Krieg schöne Gasthäuser / vnnd ein herrlich Schloß gehabt hat / darinn die Herrn Graffen von Montfort / als Herrn dises Orths / (vnd der Zeit Herren Graf Haugen gehörig) Hoff gehalten. Es seyn aber das Schloß / vnd auch fast das Stättlein / der Zeit abgebrandt. Ligt auff der Landstrassen / zwischen Ravenspurg vnd Lindaw / von jedem Orth anderthalb Meilen / doch etwas näher gen Ravenspurg.
Es ist der H. Grafen von Montfort Monatlich einfacher Reichs Anschlag vorhin 116. fl. gewesen: Weiln aber die Herren von Königsegg jhnen Stauffen / vnd Rotenfels abgekaufft / vnd deßwegen 40. Gülden; vnd die H. Fugger / wegen Wasserburg (so ein schöner Fleck am Bodensee / zwischen Langen Argen / vnd Lindaw gelegen / vor dem nächsten Teutschen Krieg gewesen / vnd daß sie / Herren Fugger / von denen von Monttfort bekommen) acht Gulden daran erstatten; So geben für sich / vnnd wegen Tetnang / vnnd Argen / Hochwolgedachte HerrnGrafen von Montfort noch 68. Gülden. Zum Cammergericht ist jhr Gebühr / deß Jahrs / dem erhöchten Anschlag nach / 56. fl. Sihe oben Montfort.
Ligt oberhalb Stulingen / vnnd ist Oesterreichisch / zur Landgrafschafft Nellenburg gehörig. An. 1455. haben etliche Knecht von den Eydgenossen Graff Hansen von Tengen vnd Nellenburg abgesagt / jhn vberzogen / an Leib vnnd Gut beschädiget / vnnd Tengen verbrandt / von wegen etlicher Knecht / jhrer Freunde / die gemelter Graff / im vergangenen Zürich-Krieg / zu Eglißow hat richten lassen. Stumpfius.
Zugenandt Ilerthissen / Weil dieses doppelte Schloß / vnd Marcktflecken / bey der Iler nahend / vnd 2. MeilWegs ohngefähr oberhalb Vlm / auff der Strassen nach Memmingen gelegen / vnd der Zeit H. Hanß Christoph Vöhlin von Frikenhausen / Freyherren zu Tissen / Newburg / vnd Hohen Ronaw / etc. sampt zugehöriger Herrschafft / zuständig;
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 181. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_238.jpg&oldid=- (Version vom 31.7.2018)
