|
Froben Christoph von Zimmern: Zimmerische Chronik. Band II. Herausgegeben von Karl August Barack. |
|
|
zugefüegt, dann er mit allem seinem kriegsvolk in voller ordnung durch die früchten gezogen und umb vil tausendt gulden schaden gethon. Er hat ain wunderbarlichen sinn zu kriegshandlungen gehapt und ain sonders ufmerken zu
allem, so zu dem krieg dienstlich sein megt; beschaint sich auß dem. Als uf ain zeit die fürnembsten und fürgesetzten zu Straßburg bei im sich irer festen, wolerbawnen statt rüempten, auch das die zu der wehr also zugericht, das sie kain gewalt besorgen dörften, hat er inen ir dorheit
endeckt und inen zu versteen geben, das sie der statt, do es am maisten die notturft erfordert, zum wenigisten hetten versorgt, und do es von neten, welt er ires undanks ein haufen reuter in die statt bringen. Dess kunten sich die selbigen nit genugsam verwundern, batten ine, solchs zu
eröffnen. Das thett er, zaigt inen ain furt durch die Breusch am understen der stat, der gieng aim ross ungefär biß an bauch und het in kainer in Straßburg von vil jaren here nit gewist oder erfaren. Also muesten sie frei bekennen und ime gewonnen geben, und damit hat er denen
meisenlockern zu Straßburg ursach geben, die statt des orts auch zu befestnen. In somma, es war ain kriegsman. Den muest ine auch [iederman][1] sein lassen, und sache auch reubisch wie ain kriegsman. Ich hab von manichen gehört, so etwar den Martem het wellen fingirn, das man sein angesicht, leib
und gestalt darzu nit het kinden verbössern. Im schmakaldischen krieg wardt er von den protestierenden stenden geen Ulm erfordert, und wolt man sein als ains berüempten und erfarnen kriegsmans und obristen rath auch haben. Wie im nun der protestierenden macht, geschütz und anderer
vorrath fürgehalten, sprach er als ainer, dem kaiser Carle und sein macht, dergleichen etlicher fürsten und obristen geiz wol bekannt war: »Lieben herren und freindt, ich laß mir ewer kriegsrüstung und anschleg wol gefallen, aber kaiser Carle, ewer parthei, ist ain kriegsfürst nit uf ain sommer,
sonder im fall der nott uf etliche jar, mit dem ir zu schaffen werden gewinnen.« Nit mer mechten sie damals ußer ime bringen, also wolt er sagen, es ist pubenwerk mit euch, ir werden kein standt thuon und letzstlich mit schaden und
schanden müeßen abziehen.
- ↑ iederman] dürfte zu ergänzen sein.
Froben Christoph von Zimmern: Zimmerische Chronik. Band II. Herausgegeben von Karl August Barack. Akademische Verlagsbuchhandlung von J. C. B. Mohr, Freiburg, Tübingen 1881, Seite 589. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Zimmerische_Chronik_2_589.jpg&oldid=- (Version vom 12.4.2018)
