|
Froben Christoph von Zimmern: Zimmerische Chronik. Band IV. Herausgegeben von Karl August Barack. |
|
|
des orts nit rainigen, aller wust bei im bliben und ein sollicher starker geschmack umb in gewesen, das gar nach niemands bei im bleiben künden. Die schön jung künigin von Schotten, sein gemahl, ist dessen wol inen worden und
wurts, wie man sagt, die tag ires lebens nit überwinden. Und waver er dieser langwürigen verstoppung halb nit im haupt ein geschwer bekommen, daran er auch gestorben, so were er doch des ussatz, wie das die medici offenlich und unverholen[1] gesagt, nit sicher gewesen. Sein brueder,
der iezig künig Carle, hat gleichergestalt ein mangl im angesicht, bei der nasen, in somma, die andern brüeder sein auch mangelhaftig, wie die zeit solchs zu erkennen wurt geben, also das zu speuren, das sie kinstellierte kinder und natürlichen nit erzeugt sein, darauß dann diese und
dergleichen mängl und defecten erwachsen. Darumb sich solcher arzneien und künsten wol ist zu enthalten. Es ist auch vor jaren ain sag gewesen, herr Hanns Jacobs von Landow son, der Jacob, sei auch mit solchen künsten erzeugt worden, das ich doch nie geglaubt; dann der mangel, den er
gehapt, nemlich das er sich keiner frawen hat künden understeen, das ist im von natur nit begegnet, sonder user untrew einer falschen, bösen magt in seines vatters behausung, als er nit über sechzehen jar alt gewesen, widerfaren. Er hat auch beharlich und das es ein bestandt het haben mögen,
nit kinden curriert werden, wiewol vil uncostens darauf verwendt worden. Das ich aber wider uf mein angefengte materiam kom, wiewol der alt herr, graf Gottfridt Wernher, vil müe und sorg het, damit sein junger vetter auch ein son bekeme
und hin und wider darüber rath ließ haben, so gab doch unser Herrgot sonst gnad, das sein gemahl in obbemeltem jar, nemlich anno 1549, schwanger wardt. Nun het aber graf Froben Christof die österreichischen lehen nach absterben seines herrn vatterns bei der regierung zu Insprug
erfordert und umb verleihung angehalten. Von dero wardt er im Junio ermelts jars geen Insprugk beschaiden, wie er dann sich uf bestimbte zeit dahin verfüegt. Dieweil aber der tirolisch canzler, doctor Beat Widman, domals anderer gescheften halb unversehenlich verraisen müesen, do kont
der graf nichs schaffen und wardt im nit gelihen. Damit
- ↑ unverholen] hs. unneholen.
Froben Christoph von Zimmern: Zimmerische Chronik. Band IV. Herausgegeben von Karl August Barack. Akademische Verlagsbuchhandlung von J. C. B. Mohr, Freiburg, Tübingen 1882, Seite 48. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Zimmerische_Chronik_4_048.jpg&oldid=- (Version vom 12.4.2018)
