Seite:Duerer Underweysung der Messung 027.jpg

aus Wikisource, der freien Quellensammlung
Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

Es ist nuetzlich zuowyssen / so drey punckten vngleich gestelt werden / das man sie behend so man seyn bedarff / in eyn zirckel verfassen mueg diß mach also / Die drey punckten seyen .a.b.c. die zeuech mit zweyen geraden linien zuesamen .a.b vnd .b.c. darnach thu jm zuogleicher weiß wie vorn in der .21. figur angetzeigt ist / suech die mittel beder linien .a.b. vnd .b.c. vnd laß die zwuo geraden linien so die zwuo fuer gegebnen linien .a.b. vnd .b.c. ytliche in der mitt von eynander teylen vndersich herab durch eynander streichen / vnd so es not thut / so erlenger die bed gerad teillinien / Darnach nym ein zirckel vnnd setz den mit dem ein fuß in den punckten .d. vnnd den andern in den punckten .a. vnd reiß darauß ein gantzen zirckel ryß / so ruerdt der zirckel / die drey punckten .a.b.c. wie jch das vnden hab auffgriesse.

24

Avch soll man wyssen zuo finden / so ein weyter zirckelryß an ein gerade lini ruert / das man dann enge halben der winckel so die linien so nahe zuosam lauffen / nit wol sehen kan / wo sie rueren / das kan man durch disen nachfolgetten weg zuo wegen bringen / Setz ein zirckeltrum .a.b. vnd eyn gerade lini die sie an ruert .c.d. Nun nym ein zirckel setz jn mit dem ein fuß in das end .c. vnd mit dem andern fuß reyß ein wenig hyneyn gegen dem end /d. ein runden ryß vndersich vnd vbersich / wo dann diser ryß die lini .c.d. durchschneyt / da setz ein .e. Darnach nym den zirckel vnuerrueckt / vnnd setz jn mit dem ein fuß[1] in den punckten .e. vnd reyß mit dem andern fuß rund durch das endt .c. wo sich dann dise zween rund ryß oben schliessen da setz ein .f. aber vnden ein .g. Darnach reiß auß den zweyen punckten .f.g. ein gerade lini / wo dise lini die zwerch .c.d. durchschneyt da setz ein .h. wo sie aber durchschneyt das zirckeltrum .a.b. da setz ein .i. Darnach zeuech auß dem punckten .i. ein zwerch barlini. gegen der oebern zwerch lini .c.d. wo dann dise lini das zirckeltrum durchschneidt / gegen dem end .b. da setz eyn .k. Darnach nym die leng .i.k. vnd leg sie auff die lini .c.d. mit dem eyn end in den punckten .h. vnd jr leng schneyd gegen dem .d. mit einem punckten .l. ab / Darnach zeuech .l.k. gerad zuosamen so wirdt darauß eyn ablang firung .h.l.k.i. nun so du das mittel wilt finden / in welchem punckten die krum lini .a.b. die gestrackt .c.d. anruer / so nym ein zirckel / setz jn mit dem ein fuß in den punckten .l. mit dem andern reiß durch den punckten .h. rund vbersich vnd vndersich / Darnach verker den zirckel / vnd setz jn mit dem ein fuß in den punckten .h. vnd reyß mit dem andern fuß rund durch den punckten .l. vbersich vnnd vndersich / wie das in der .21. angetzeygt ist / wo dann dise zween runden ryß sich oben schliessen / da setz ein .m. aber vnden eyn .n. Darnach reyß eyn gerade lini .m.n. wo dann dise lini / die zwerch .c.d. durchschneyt da setz eyn punckten .o. der ist das ort / da die krum lini .a.b. die gerad lini .c.d. anruert / wie du das hie vnden auffgeriessen sihest.

  1. ↑ Vorlage: fstß
Von „https://de.wikisource.org/w/index.php?title=Seite:Duerer_Underweysung_der_Messung_027.jpg&oldid=3304872“