Seite:Duerer Underweysung der Messung 061.jpg

aus Wikisource, der freien Quellensammlung
Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

diameter .a.b. vnd schneid den mit einem punckten .d. in der mit von einander vnd brauch die leng .c.d. zue .13. malen im zirckel herum / ist aber auch mechanice vnd nit demonstratiue.

19

Ein ytlich trum eins zirckels das mir fuer kumbt teyl jch in .3. teyl also / Das zirckeltrum sey .a.b. mit einer geraden lini zuesamen zogen / vnd wie jch vor gelert hab theyl jch die gerad lini .a.b. mit zweyen punckten .c.d. in drey gleyche felt. Darnach setz jch ein zirckel mit dem ein fuß in den punckten .a. vnd mit dem andern reiß jch auß dem punckten .c. ein ryß durch die zirckellini / wo die durchschnyttenn wirdt / da setz jch ein .e. Darnach setz jch den zirckel mit dem ein fuß in den punckten .b. vnd mit dem andern reiß jch auß dem punckten[1] .d. durch die zirckellini / wo sie durchschnitten wirded / da setz jch ein .f. Darnach zeuech jch zwue aufrecht lini auß .c.d. biß an die zirckellini da setz jch .g.h/ so werden die drey leng im zirckeltrum .a.e.g.h. vnd .f.b. gleich an einander / vnd bleiben zwey eng teil .e.g. vnd .h.f. vber / darnach nym jch ein zirckel / setz jn mit dem ein fuß in den punckten .a. vnd den andern in den punckten .g. vnnd von dann reiß jch biß auf die gerad lini .a.b. da setz jch ein .i. darnach setz jch den zirckel mit dem ein fuß in den punckten .b. vnnd reiß mit dem andern auß dem punckten .h. auf die lini a.b. da setz jch ein .k. Darnach teil jch .c.i. vnd .k.d. wie jch vor gelert hab / mit zweyen punckten in .3. teil / vnd setz den zirckel mit dem einen fuß in den punckten .a. vnd den andern in den negsten punckten / bey dem .i. vnd reiß biß an die zirckellini / da setz jch ein .l. Darnach setz jch den zirckel mit dem einen fuß in das .b/ vnd den andern in den negsten punckten bey dem .k. vnd reiß von dann an die zirckellini da setz jch ein .m. also wirdet die zirckellini .a.b. mit den zweyen punckten .l.m. in .3. teyl geteylt / wie jch das vnden hab aufgeryssen / wer es will geneuer haben / der such es demonstratiue.[2]

[20]

So man zirkellini in den estrichen oder in ein want zufersetzen brauchen will / mag man sy zweyerley art an ein ander rucken. Zum ersten / durch recht winckliche quadraten. Zum andern / durch rauten[3] fierung.

Anmerkungen (Wikisource)

  1. ↑ Vorlage: puckten
  2. ↑ Seit dem 19. Jahrhundert gilt es als erwiesen, daß dieses alte Problem der Dreiteilung eines beliebigen Winkels nicht lösbar ist. (Wikipedia).
  3. ↑ Vorlage: ranten
Von „https://de.wikisource.org/w/index.php?title=Seite:Duerer_Underweysung_der_Messung_061.jpg&oldid=2899899“