46 Vnd Maria sprach, Meyne seel erhebt den herrn 47 vnd meyn geyst frewet sich ynn Gott meynem heyland. 48 Denn er hat die nydrickeyt seyner magd angesehen, Sihe, von nu an werden mich selig preyssen alle kinds kind. 49 Denn er hat grosse ding an myr than, der do mechtig ist, vnd des name heylig ist. 50 Vnd seyne barmhertzigkeyt weret ymer fur vnd fur bey denen die yhn furchten, 51 Er hat gewalt vbet mit seynem arm, vnd zurstrewet die da hoffertig sind ynn yhrs hertzen synn, 52 Er hat die gewalltigen von dem stuel gestossen, vnd die nydrigen erhaben, 53 Die hungerigen hatt er mit guttern erfullet, vnd die reychen leer gelassen. 54 Er hatt der barmhertzigkeyt gedacht, vnd seynem diener Jsrael auff geholffen, 55 wie er geredt hat vnsern vettern Abraham vnd seynem samen, ewiglich. 56 Vnnd Maria bleyb bey yhr bey drey monden, darnach keret sie widderumb heym.
57 Vnd Elisabeth kam yhr zeyt, das sie geperen solt, vnd sie gepar eynen son, 58 vnd yhr nachparn vnd gefreunten horeten, das der herr grosse barmhertzigkeyt an yhr than hatte, vnd freweten sich mit yhr. 59 Vnd es begab sich am achten tage kamen sie zu beschneytten das kindlin, vnd hiessen yhn nach seynem vatter, Zacharias. 60 Vnd seyne mutter antwortet, vnd sprach, mit nichten, sondernn er soll Johannes heyssen, 61 vnd sie sprachen zu yhr, ist doch niemant ynn deyner freuntschafft, der also heysse. 62 Vnd sie wincketen seynem vatter, wie er yhn wolt heyssen lassen, 63 vnd er foddert eyn teffelin, schreyb vnd sprach, Er heyst Johannes, vnd sie verwunderten sich alle, 64 vnd als bald wart seyn mund vnd seyne zunge auffthan, vnd redte vnd benedeyet Gott, 65 Vnd es kam eyn furcht vber alle nachparn, vnd all dis geschicht wart ruchtig auff dem gantzen Judischen gepirge, 66 vnd alle die es horeten namens zu hertzen, vnnd sprachen, was, meynstu, will aus dem kindlin werden? denn die hand gottis war mit yhm.
67 Vnd seyn vater Zacharias wart des heyligen geystes voll, weyssagt vnd sprach, 68 Gebenedeyt sey Gott der herr von Jsrael, denn er hatt besucht vnd erloset seyn volck, 69 Vnd hatt auff gericht eyn horn der selickeyt ynn dem hausse seynes dieners Dauid, 70 Als er vortzeytten geredt hat durch den mund seyner heyligen propheten, 71 Das er vns erredtett von vnsern feynden, vnnd von der hand aller die vns hassen, 72 Vnd die barmhertzigkeyt ertzeygette vnsern vetern, vnd gedecht an seynen heyligen bund, 73 das ist, an den eyd, den er geschworen hatt vnserm vater Abraham, vns zu geben, 74 Das wyr erloset aus der hand vnser feynde, yhm dieneten on furcht vnser leben lang 75 ynn heylickeyt vnd gerechtigkeyt die yhm gefellig ist. 76 Vnnd du kindlin wirst eyn prophet des hohisten heyssen, du wirst fur dem herrn her gehen, das du seynen weg bereyttest, 77 vnd erkentnis der selikeyt gebist seynem volck, die do ist ynn vergebung yhrer sunden, 78 durch die hertzliche barmhertzigkeyt vnsers gottis, durch wilche vns besucht hat der auffgang(auffgang) Christus nach der Gottheyt ist der auff gang ynn der hohe vom vatter. aus der hohe, 79 Auff das er erscheyne denen, die da sitzen ym finsternis vnd schatten des tods, vnd richte vnser fusse auff den weg des fridens.
[214] 80 Vnd das kindlin wuchs vnd wartt starck ym geyst, vnd war ynn der wusten, bis das er sollt her fur tretten fur das volck Jsrael.
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 89. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_095.jpg&oldid=- (Version vom 24.10.2016)
