[WA.DB 7,326]
Djeße erst Epistel sanct Johannis ist eyn rechtschaffene Apostolische Epistel, vnd solte billich bald nach seynem Euangelio folgen. Denn gleych wie er ym Euangelio den glawben treybet, also begegnet er ynn der Epistel denen, die sich des glawbens rhumeten on werck, vnnd leret manchfeltig, wie die werck nicht aussen bleyben, wo der glawbe ist, bleyben sie aber aussen, so ist der glawbe nicht rechtschaffen, ßondern lugen vnd finsternis. Er thut aber das selb nicht mit treyben auffs gesetz, wie Jacobs Epistel thut, ßondern mit reytzen, das wyr auch lieben sollen, wie Got vns geliebt hat.
Er schreybt aber auch drynnen hart widder die Cherinter, vnd widder den geyst des Widerchrists, der schon datzumal anfieng Christum zuuerleucken, das er yns fleysch komen sey, wilchs nu aller erst recht ym schwang geht. Denn ob man wol ytzt nicht leucket mit dem mund offentlich, das Christus yns fleisch komen sey, so leucken sie es doch mit dem hertzen, mit der lere vnd leben, Denn wer durch seyn werck vnd thun wil frum vnd selig werden, der thut eben so viel, als wer Christum verleucket, Syntemal Christus darumb yns fleysch komen ist, das er vns on vnser werck, alleyn durch seyn blut frum vnd selig machet.
Alßo streytt diße Epistel widder beyde teyl, widder die gar on werck seyn wollen ym glawben, vnd widder die, so mit wercken wollen frum werden, vnd behelt vns auff rechter mittel straß, das wyr durch den glawben frum vnd der sund loß werden, Vnnd darnach auch, wenn wyr nu frum sind, gutte werck vnd liebe vmb Gottis willen vben frey on alles gesuch.
Die andern zwo Episteln sind nicht lere Episteln, sondern exempel der liebe vnd des glawbens, vnd haben auch eyn rechten Apostolischen geyst.
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 356. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_362.jpg&oldid=- (Version vom 26.9.2016)
