Seite:Luther Das Newe Testament Deutzsch 419.jpg

Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.

	Martin Luther: Das Newe Testament Deutzsch

Das zehend Capitel.

[X.]¹ Vnnd ich sahe eynen andern starcken Engel vom hymel ab komen, der war mit eyner wolcken bekleydet, vnnd eyn regenbogen auff seynem hewbt, vnd seyn antlitz wie die sonne, vnd seyne fusse wie fewr pfeyler, ² vnd er hatte ynn seyner hand eyn buchle auff gethan, vnnd er setzet seynen rechten fuesß auff das meer, vnd den lincken auff die erden, ³ vnd er schrey mit lauter stym, wie eyn lewe brulet, vnd da er schrey, redeten sieben donner yhre stymme, ⁴ vnnd ich wollt sie schreyben, da horet ich eyn stym vom hymel sagen zu myr, versigel was die sieben donner geredet haben die selbe schreyb nicht.

⁵ Vnd der engel, den ich sahe stehen auff dem meer vnd auff der erden, hub seyne hand auff gen hymel, ⁶ vnd schwur bey dem lebendigen von ewickeyt zu ewickeyt, der den hymel geschaffen hat vnd was drynnen ist, vnd das meer vnnd was drinnen ist, das hynfurt keyne zeytt mehr seyn soll, ⁷ sondern ynn den tagen der stymme des siebenden Engels, wenn er posaunen wirt, so sol vollendet werden das geheymnis Gottis, wie er hat verkundiget seynen knechten vnd propheten.

⁸ Vnd ich horet eyne stym vom hymel abermal mit myr reden vnd sagen, gang hyn, nym das offne buchlin von der hand des Engels, der auff dem meer vnd auff der erden stehet, ⁹ Vnnd ich gieng hyn zu dem Engel vnd sprach, gib myr das buchlin, Vnd er sprach zu myr, nym hyn, vnd verschlings, vnd es wirt deynen bauch verbittern, aber ynn deynem mund wirts susß seyn, wie honig, ¹⁰ Vnd ich nam das buchlin von der hand des Engells vnd verschlangs, vnnd es [446] war meynem mund, wie susß honig, Vnd da ichs gessen hatte, wart meyn bauch verbittert, ¹¹ vnd er sprach zu myr, du must aber mal weyssagen den volckern vnd heyden vnd zungen vnd vielen konigen.

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 413. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_419.jpg&oldid=- (Version vom 6.10.2016)