EIn yeder vmbkreyß eins cirkels / so er außgestreckt würt / der helt in jm seinen Diameter / das ist / die linien von einem theyl des Circkels rissz / durch das zentrum zuo dem andern / zuo dreyen malen / vnd darzuo ein sybentheyl eines diameters / Wie du vor augen sehen würst / in disem vorgehnden exempel.
ERstlich setz zwen puncten a b als weit du wilt / reissz von einem zuo dem andern ein linien / Darnach mit solcher weitin a b reissz auß yedem puncten ein circkel / vnd wo die circkel einander zerschneiden in dem puncten c d / do reissz ein linien durch als lang du wilt / Darnach reiß ein halben circkel vß dem d durch das a b biß vff die beyde circkel / die selbigen merck mit f g / vnd wo diser halb circkel zerschneidt die linien c d / do setz ein e / Darnach auß dem puncten f g / durch den puncten e reissz zwo creützweiß linien biß an den circkel / daselbst zeychen die puncten mit h k / darnach setz den circkel mit einem fuoß in das h / vnd mach ein puncten in der linien c d / den zeychen mit dem i darnach von h vnd b / vnd von dem h i vnd k i reissz das fünff eck / so hast du fünff eck gerecht.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 5. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_05.jpg&oldid=- (Version vom 31.7.2018)
