ERstlich nym für dich das horologium Equinoctiale / vnd setz den circkel mit einem fuoß in den centrum des horologions b / vnd mit dem andern in den puncten der 12 stund lini / auff der lini w x / solche weitin setz mit einem fuoß in das a / der 12 zeychen lini abgesetzt / vnd mit dem andern fuoß mach ein puncten y auff der lini ♈ vnd ♎ / auß disem puncten y reissz ein gerade scheitrecht linien / biß an die linien ♋ / oder ♑ / vnd zeychne den puncten mit z / Darnach setz den circkel mit einem fuoß in das y / vnd mit dem andern in das z / solche weitin trag als dann in das horologion Equinoctiale / auß dem puncten auff die 12 stund lini Equinoctialis / oder die 6 lini horologij Orientalis oder Occidentalis / vnd schlag solche weitin zuo beyden seiten vff der selben lini / so hastu auff einer seiten den anfang ♋ / auff der andern den anfang ♑ / zuo der selben stunden / vnd also für auß thuo auch vff den andern stund linien / setz den circkel mit einem fuoß in das b / des horologions Equinoctialis / vnd mit dem andern in yeden puncten aller stund lini / in der lini w x / sollich weitin trag in den puncten a / der zwoelff zeychen linien / vff die lini ♈ vnd ♎ / vnd vß dem selben puncten reiß gerad lini biß an die linien ♋ oder ♑ / Darnach trag widerumb die selbig weitin / ein yede vff ein eygne stund lini / wie obgesagt ist / so hastu die 12 zeychen in yeden stunden / wie du dann in obgeschribner vnd gesetzter figur der 12 zeychen lini genuogsamen bericht nemen magst.
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 34. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_34.jpg&oldid=- (Version vom 31.7.2018)
