MAch ein gerade fierung a b c d / von den selben vier ecken reissz zwen blind rissz creützweiß über einander / vnd wo sye einander abschneiden / daselbst mach ein puncten e / auß disem puncten reissz ein blinden circkel / das er alle vier ort lini betreff / vnd theyl den selben circkel in vier gleich theyl / das auch darmit die fierung zuo vier gleichen wincklen vnd quadranten getheylt werden mit zweyen creütz weiß linien f g vnd h i / also würt die lini f e g oben die lini des zenit / das ist / des aller obersten vnd hoechsten puncten o auff das haupt / welche geleich ist dem vertical / vnden würt die lini der fuß oder basis des stoecklins / vnd die lini h e i / würt die lini orizons gleich dem horizontal oder plano. Darnach theyl ein yetlichs viertheyl in 90 grad / vnd zel von dem i übersich gegen dem f / darnach von dem f gen dem h / auch von dem h gen dem g / vnd von dem g gen dem i. Darnach such die polus hoehe in allen viertheylen / vnd vff die end setz die puncten k l m n / durch dise vier end der zal vnd puncten reissz zwo creütz lini durch den puncten v / biß an den circkel / vnd die lini n e l bezeychnet dir augem mundi / nach welcher die stefft eyngesteckt werden sollen / vnd die lini m e k / bedeüten den Equinoctial / Darnach reissz ein gerad linien durch den puncten m / von der lini a h / biß auff die lini a f / also das die selbig lini ein paralel lini sey / gegen der lini l e n / deß gleichen thuo durch das k / auch durch das n vnd l / das die selbigen paralel lini werden gegen der lini m e k. Vnd so du die vier eck a b c d der fierung abschneidest zuo allen seiten / so kummen dir achteck / darauff du allerley horologien beschreiben magst / vnd das stoecklin soll allweg geordnet werden / das die lini der Axis mundi steh zeygend gegen dem polo arctico / wie dann dz fedemlin in dem compaß anzeygt / also gibt dir das feld h das vertical meridional / gegen mittag das feld l / das vertical meridional der rechten sper / das ist / gegen dem equinoctial. Das feld f gibt dir das horizontal auff dem plano / gegen dem centrum / das feld n gibt dir das vertical Septentrionalis der rechten sper / das ist / gegen dem polo arctico / das feld i das vertical septentrional gegen mitternacht / vnd das feld k gibt das horizontal septentrional gegen dem Equinoctial
Georg Vogtherr: Ein wolgegründs kunstreichs Summari Buechlin / aller Sonnen Vhr / auff acht oder vier eckete stecklin / in Büchsen / Cylinder / vnd auff Guldne ring / Auch auff glaß / alle mauren / schreg oder vnschreg zuomachen. Auch wie man alle schrege vnd außschlag der grad an yedem hauß oder fenster / leichtlich vnd gerecht finden solle., Straßburg 1544, Seite 35. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:DE_Sonnen_Vhr_35.jpg&oldid=- (Version vom 31.7.2018)
