daß nahe bey diesem Ingelheim / im Dorff Waltzheim / Anno 879. auß der gantzen Gegend herumb / viel Baurenhund zusammen kommen / vnnd die Todtencörper auß der Erden geschorren / vnd bald alle sich wider / daß niemand / wo sie hinkommen / gewust / verlohren haben.
Ligt nahent Breuberg / im Odenwald / hinder Weinheim / Stättlein / vnd Schlößlein / davon Munsterus libro 5. cap. 289. schreibet / daß solches Schloß / sampt der Vogtey / auch aller Iurisdiction, im Jahr 1277. vmb 5030. Marck Silbers / von Pfaltz seye erkaufft worden; so vorhin den Marggrafen von Baden zugehörig war. Es muthmassen etliche / daß es / vor Alters / ein Römisch Castell gewesen / so folgents den Grafen im Craichgöw gehört habe / vnd von denen auff die besagte Herren Marggrafen kommen seye. Ist zwar ein rauch Orth / der aber gute Forellen / vnnd andere Fisch / auch Viehweide / vnd ein Kellerley / hat.
Ein Stättlein in der Vndern Pfaltz / zwischen Altzey / vnd Oppenheim gelegen / allda vor Jahren das Stifft Metz zu gebietten hatte; aber Anno 1258. von den Domherren deß Hohen Stiffts daselbst / alle Güter / so sie allhie gehabt / den Domherren deß Ertzstiffts Meyntz / vmb 1040. Pfundt Metzer Müntz verkaufft worden / wie Trithemius in Chronico Sponheimensi schreibet; auch saget / daß S. Rufus weyland Bischoff zu Metz / noch zu seiner Zeit allhie begraben gelegen seye. Aber das Stättlein selbsten / mag wol dem Reich gehört haben / dieweil Munsterus lib. 5. cap. 150. schreibet / daß Anno 1402. solches / sampt Oppenheimb / Käyserslautern / vnd Ingelheim / von dem Reich / dem Pfaltzgrafen / vmb hundert tausent Gulden versetzt worden seye; nach dem Käyser Carolus IV. Anno 1353. solchen Orth / sampt Oppenheim / so vorhin dem Stifft Meyntz vor 90. tausent Gulden versetzt gewesen / wider zum Reich gebracht hatte; wie Albertus Argentinensis berichtet: Besihe hieunden Oppenheim. Es wird dieser Pfältzische Orth in dem jetzigen Krieg / sonders zweiffels / auch viel erlitten haben; wiewol wir noch zur Zeit nichts eigentlichs davon auffgezeichneter finden. Wie es dann in dergleichen Landsverderbungen / vnd Zerrüttungen daher gehet / daß man wenig beschreibet; sondern nur jammert / vnd klaget; auch ein jeder sonsten mit andern seinen Sachen gnug zu thun; oder / so er etwas verzeichnet / noch zur Zeit herauß zu geben / Bedenckens hat.
Auch ein Vnder Pfältzische Statt / zwischen Manheim / vnd Franckenthal / so etwan schön / vnnd auch wol bevestigt / allbereyt vor diesem Krieg gewesen / vnnd zun Zeiten Käysers Caroli Magni Agridesheim / wie Freherus part. 2. Orig. Palat. cap. 13. fol. 64. schreibet / genant worden / vnnd daselbsten in deß offentlichen Gasthoffs Thür ein alte Statua Mercurii zu sehen / wo anders in dieser Landsruin solche nicht hinweg kommen ist. Ligt im Wormbssergawe / so Pfaltzgraf Adolph / K. Ruprechts Großvatter / auß einem Dorff / zu einem Stättlein gemacht hat / wie Munsterus lib. 5. c. 149. berichtet. Es schreibet M. Iohan. Philippus Abelinus, seinem Theatro Europaeo fol. 599. daß in besagtem vnserm Teutschen / vnd leydigen Krieg / dieser Orth von den Inwohnern / biß auff einen Schaaffhirten / Hanß Warsch genant / verlassen worden / als Don Cordoua (mit der Spanischen Armée) auff solches zugezogen; da dann mit jhme besagter Schaafhirt tractirt, daß er / der Don Cordoua, ihn bey seiner Religion / vnd allem / was er habe / lassen / vnd sampt Weib / vnd Kindern / schützen wolle / so er auch erhalten / ein Salva guardia jhme vors Hauß gestellt / vnd folgents dieser Spanisch General sein Gevatter worden ist. Wie es aber folgents allhie zugangen / davon finden wir nichts / als daß Anno 1644. die Spanischen auß Franckenthal wegen Mangel Holtz / dieses Stättlein biß auff wenig Häuser abgebrochen / vnd das Holtz in Franckenthal gebracht.
Matthäus Merian: Topographia Hassiae. Frankfurt am Mayn: Matthäus Merians Erben, 1655, Seite XXV. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Hassiae_279.jpg&oldid=- (Version vom 31.7.2018)
