halbe Faust gros / wie jn der Teuffel angegriffen / und die alle drey stück an jm durchgebrant gewesen / auch der Nagel auff einem Finger war jm abgerissen. Der Nadband von Galloten ist unversert geblieben. Die Strümpffe hat er theils an Füssen gehabt / und wie man sie abgezogen / sind die Funcken doraus geflogen. Unter diesem hat er stets geruffen / Lescht ab / lescht ab / ich wil euch mein halb Gut vorehren: Do haben sie auff jn Schnee geworffen / es hat aber nichts geholffen. Die Kohlen haben sehr gebrant / wie ein glüendes Fewreisen / welches sie nicht viel geacht / im willens dem Meltzer zu helffen / Darumb legten sie jn auff ein Schlitten / und führeten jn eilends heim in sein Haus. Darnach kamen sie wider in den Keller / und wolten die Kohlen leschen / aber funden nur kalte Aschen an derselben stelle / und dorauff zween Schlüssel / auch etwas von kleinem Gelde / ungefehr bey einem halben Taler / das er in seinem Beuttel in dem Schiebsack gehabt / aber der Beuttel ist verbrant / die Schlüssel und das Geld schwartz berauchert gewesen / welches man gar leichtlich abgerieben / das es wider wie zuvor gut gewesen / in dem Keller hat man lange Zeit den Schweffel gerochen.
Erstlich wie er ist daheim gelegen und ein Trunck gethan / hat jn noch viel mehr gedurst / darnach kunte er keinen Trunck behalten / Etliche haben vermeint / das die Gall in jm zurissen were. Am Freitag den 17. Januarij / als er sahe / das er von dieser Welt scheiden must / befahl er sich dem lieben Gott / und hat jn sehr gerewet / das er so lange Zeit hero sich mit Gott nicht versönet / und bey dem heiligen Abendmal nicht gewesen. Letzlich / bat er das umbstehende Volck / sie sollen den HErrn von seiner wegen bitten / das er nach seinem Tode / sein Söhnlein / welches stum ist / nicht verlassen wolt. Gantze vier und zwentzig Stunde hat er seine jemmerliche Plage gehabt / und denselbigen Freitag umb 7. Uhr sein Leben geendet. Am Sontag hernach den 19. dato ist er alldar bey der Kirchen begraben worden. Gott wolle seiner Seelen gnedig sein / Amen.
unbekannt: Grausame/ Erschreckliche newe Zeittung/ wie in einem Stedlen Muthenin genant/ [...]/ einen Meltzer mit Namen Michael/ [...]/ der Teuffel [...] von Fuß auff bis auff die Gürtel gebraten/ [...]. Erfurt: Esaias Mechler, 1603, Seite 5. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_vd17_12_665803C_005.png&oldid=- (Version vom 31.7.2018)
