Fürsichtigen ersamen wysen besondern lieben und gutten Fründt. Unser früntlich willig Dienst syen üch allzyt zuvor berait. Uff gestern zu fruger Rattzyt ist vor uns gewesen der edel vest Rudolff von Blumenegk Kaiserl. Majestät Ratt, und hatt uns furgehalten sin Werbung und Bevelh des ungepurlichen Furnehmens ettlicher Lütten, so yetzmal vorhanden ist. So hat uns üwer Diener Hanns Trubelder überantwurtt üwer Schriben mitt sampt ainem ingelegen Zedel, und Unterrichtung desselben Handels zu gutter Maß ainer glicher Mainung luttend.
Wir als die so ain mergelich Misfallen an dem Handel tragen, haben sie abgeverttigett mitt Erpiettung, uff die Angezeigtten Uffsehen zu haben, und ihr Werbung nach gepurlich zu handlen. Unlang darnach und als die baid erst von unser Statt geritten sind, so haben wir zwen venglich annemen lausen; nempt sich der ain Augustin Enderlin und der ander Thoma Müller, und sind baid von Lehen, derselben Namen in üwerm Schriben anzeigtt syn. Wir haben sie von Stund an lausen erfragen des Handels halb, und an ihnen erfunden, daß sie nit vyl dawider reden, ihnen sye ettwas davon wissend; daß sie aber darumb nichtz zugesagtt oder einich Beuelh haben zu handlen, das sye auch nit. So sie aber vernomen haben, daß ettlich ander arm Gesellen, des Handels halb gefangen, gethurntt und gemarterett worden, so syen sie zwen ledig Gesellen, und haben sich erheptt an andern Enden zu enthalten. Sie haben uns auch deß Hauptsechers halb ettwas Anzaigung geben, und sich versehen, es wurde vilicht der oder ander auch an diß Ort kommen. Demnach so haben wir auch auch so best wir mögen unser Kundtschafft daruff gemacht, ob das syn mocht, den auch anzunemen; es ist aber noch nitt beschehen. Diß Mainung haben wir dem von Blumnegk angends uff gestern zugeschriben, der hatt uns widerumben schrifftlich gepetten, üwer Wishaitt sollichs
Heinrich Schreiber: Der Bundschuh zu Lehen im Breisgau. Freiburg im Breisgau, 1824, Seite 86. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Der_Bundschuh_zu_Lehen_im_Breisgau.djvu/92&oldid=- (Version vom 31.7.2018)
