mitteln vorgezogen / alß auch bey obbesagtem Wahltag / die wolgemeinte Consilia, Warnungen vnd Protestationen in wind geschlagen / vnd jhren einmal vorgesetzten / zuvor lang getriebenen vnd vergliechenen Zweck durchzudringen / alle mittel vnnd weg gesucht haben / die Vrsach / dardurch die Böhmischen Ständ vnd Incorporirte Länder zu dieser endlichen Resolution bewogen worden / zuzuschreyben sey.
Wie gar man auch andern theils zu keiner Friedfertigkeit geneygt / das gibt der Progress aller Sachen / vnd dieses genugsam zuerkennen / das auch noch bey Anfang vnserer Königlichen Regierung / da wir vns gleich auff gehabten anlaß zur friedlichen Tractation erboten / dieselbe gäntzlich außgeschlagen worden.
Daß aber vns zugemessen werden will / als solten wir durch annehmung deren vns ohne einiges eindringen / ordentlicher Weiß der Cron Böhmen rechten vnd Fundamental Satzungen / auch dem Herkommen nach / auffgetragene / vnd durch vorhergegangene rechtmässige abdication erledigten vnd gäntzlich vacirenden Cron Böhmen / der Kays: Mtt: solche Königreich / vnd die Incorporirte Land wider den allgemeinen Landfrieden / durch Rebellische Waffen / eygenthätlicher weiß zu entziehen vnterstanden haben: daran geschicht vns zumal vngütlich: vnd mögen auch darüber aller Vnparteyischen / in vnd ausserhalb Reichs / gebührende erkantnuß leyden: Sintemal durch der löblichen Ständ in Böhmen vorgemelte publicirte vnterschiedliche Deductionschrifften / nicht allein jhre Befugsamkeit vnd rechtmässige Vrsachen der vorgenommenen abdication, sondern auch jhr wolhergebrachtes Recht / der Freyen Wahl / vnd das niemand mit fug vnd grunde darwider einiger rechtmässigen Succession sich berühmen / vnd darbey durch gefährliche / den Legibus Fundementalibus gantz wiedrige pacta vnd cessiones, wider vnd hinder der Ständ wissen vnd willen / mehrgemeldt Königreich Böhmen /
Friedrich V. von der Pfalz: DEr Königl: Mtt: in Böhmen Bericht und Erklärung / wider die vnter dem Nahmen der Käyserl: Maytt: außgangene vnd ferners angedroete / nichtige / wider Rechtliche vnd verbotene Mandata vnd Declarationes die Cron Böheimb betreffendt.. , Prag 1. Juli 1620, Seite 6. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Der_K%C3%B6nigl_Mtt_in_B%C3%B6hmen_Bericht_und_Erkl%C3%A4rung_08.jpg&oldid=- (Version vom 31.7.2018)
