|
Eucharius Rößlin: Der Swangern frawen vnd hebammen roszgarten |
|
|
geburt. Darumb das die scherpffe des harns vnnd des schweiß nit etze / vnd ser mach das kind / o& das erst felin. Dann dieweil das kind in müter leib ist / so harner es nit zu seinen gemechten / son& sein harn flüsser durch ein aderlin von des kinds nabel in das ander felin / von den yetzund gesagt ist. Das drit felin / das dem kind aller nechst anlyt / vnd es ganz vmbgibt / vnnd beschirpmt das kind vor der scherpffe seins harns / sodan von im vß dem nabel durch ein rorlin o& aderlin flüßt in das ander felin. Auch beschirmpt das drit felin das kind vor der hertin des ersten felins / Vnn das drit felin / als da spricht der groß Albertus / würt genennet von den hebammen zu latin Armatura conceptus / vnd zu teutsch ein schirm des kindes. Anicenna nennet diß felin abgas.
Das ander capitel sagt von
der zeyt der geburt Auch welche geburt natürlich oder wider
die natür sey.
Wan nun die zeit verschynen ist / das ein fraw gebe / ren soll / als gewonlich geschicht in neün monaten so die fraw den vierzig wochen ist nahen / nachde vnd sie schwanger worden ist / so erschynen gewonlich dise zeichen. Zum ersten die fraw befyndt beschwernüß vnden in dem lieb vnder dem nabel / vnd im rucken. Zum andern so befindt sie wee in den bieginen neben den gemechten zum dritten so hat sie groß hitz der bermuter. Zum vierden / so empfindt die fraw in iren gemechten da die bermuter ansept entpfintliche erpleyung vnd feüchtigkeit. Diß seind zeichen so die geburt naher. So nun die bieginen neben den gemechten sich vast erpleyen / so ist es an der zeit der geburt.
Eucharius Rößlin: Der Swangern frawen vnd hebammen roszgarten. Steyner, Augsburg 1513, Seite 16. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Der_Swangern_frawen_vnd_hebamme_n_roszgarte_n.pdf/22&oldid=- (Version vom 10.4.2024)
