|
Eucharius Rößlin: Der Swangern frawen vnd hebammen roszgarten |
|
|
¶ Das erst zeichen / wann der frawen brust / die vorhin gesundt / keck vnnd vest / vnd vol ist gewesen / abnympt / ler vnnd welck würdt / oder nider sitzt / so mißlingt ir gewonlich / als Ipocras vnnd Auicenna sprechend / Dann wann der frawen brust schnel vnnd gechlich abnympt / so mißlingt ir vff den selben tag / Vnnd ob ein fraw zweyer kinder schwanger wer / vnnd die ein brust welck würde / die vor gesund vnd keck was / so mißlingt ir zuo dem kind das da lyt in der seiten an der die brust ist welck worden / Vnd spricht Ipocras / Würt die recht brust welck / so mißlingt ir zuo einem knaben / dan gewonlichen ein knab in der rechten seiten ligt / vnnd ein meigtlin in der lincken seiten / Das sollman also verston / wann ein fraw schwanger ist zweyer kind / eins kneblins vnnd eins meigtlins. Ob aber die kind beid knaben weren / oder alle beid meigtlin / an welicher seyten dann die brust welck wurt / so mißlingt ir zuo dem kind das in der selben seiten ligt. ¶ Item andre zeichen / wann die fraw groß wee in der bermuoter befürdt / vnnd rötet ir das angesicht / vnd zittert ir der leib / in dem fieber / mit dem haupt wee / vnnd entpfindet groß wee inwendig in den augen gegen dem hürn zuo / vnnd würt die fraw laß vnd schwer in iren glidern. Die zeichen bedeüten das der frawen von stund an / in kurtzer zeit mißlingen würt / vnnd besonder so die fraw mit dem obgemelten zeichen irs bluomen vyl gewar würt. ¶ Item andre zeichen So der frawen leib sich vffpleygt / spant vnd hert würt / vnnd doch nit schwer / vnnd lauffen die plest hin vnd her wider / vß einer seiten in die andern / vnnd besonder so der blast wöret / so die fraw ysset oder trincket die ding die pleyen / Das ist ein zeichen das der frawen mißlingen möcht / von bösen plesten oder winden / vnd besonder im andern oder vierden monat.
Eucharius Rößlin: Der Swangern frawen vnd hebammen roszgarten. Steyner, Augsburg 1513, Seite 63. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Der_Swangern_frawen_vnd_hebamme_n_roszgarte_n.pdf/69&oldid=- (Version vom 6.5.2025)
