Seite:Hugo Martina 1856 0322.png

	Hugo von Langenstein: Martina

Disen wunden genen heilen

Disen eren den verteilen

Mengen gar vertriben

70

Uon kinden vnd von wiben

Diz leitet zvo der helle

Swie vil ich sin gezelle

Daz wiget harte cleine

Gein der welte meine

75

Und ir grozin hofart

Div ist vil vngespart

Svz wert diz govgel spil

Vntz an der welte zil

Diz ist des geistis plage

80

Ein kvmberlichiv lage

Dem libe als ich künde

Were ez ioch niht sünde

Ob dv mir niht gelobest noch

Hern salomon gelovbe doch

127d,85

Der die warheit sach

Vnde mit warheit sprach

Ich hohte nach miner girde

Minv werc mit wirde

Und nach mines herzin gir

90

Lebte ich vnde bute mir

Mengen richen palast

Dem gezierde nie gebrast

Von reben wirgarten schone

Minen ovgen zelone

95

In richir kost ich bute

Ze menger hande crute

Garten harte rilich

Ich mohte mir so frilich

Bovngarten harte cluoge

100

Und dar in mit fuoge

Von bovmen aller leige

Da mit der liehte meige

Schone was gegestit

Mit wunnen vbirlestit

105

Gelosit vnd gekronit

Gezierit vnd geschonit

Diz tet minen ovgen wol

Ich bute wiger wazzers vol

Daz siv erfuhten gar genvoc

110

Daz gebovme daz da truoc

Menger hande fruhte

Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 322. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0322.png&oldid=- (Version vom 18.8.2016)