Fertig. Dieser Text wurde zweimal anhand der Quelle korrekturgelesen. Die Schreibweise folgt dem Originaltext.
- 90Swaz ir wart gepredigot
- Daz wac si harte lihte
- In vollekomener bihte
- Sprach si ane fristen
- Ich bin dur crist cristen
- 95Dem begihe ich ane lovgen
- Offenlich vnd tovgen
- Den div maget sovgte
- Vnd sich menschlichen ovgte
- Daz er den tievil betruge
- 100Und vz sinem gewalte zvge
- Sine liebin hantgetat
- Die er nach im gebildet hat
- Der er lange wart entwert
- Verwustet vnde gar verhert
- 105Was daz menschlich gedigen
- Elliv wer was im verzigen
- Daz het nv crist enpflœhit
- Gefriget vnd gehohit
- Ubir allir engil kvnne
- 110In vnzallicher wunne
- Den vergihe ich vil reine
- Mit drin namen eine
- 186,1Nach dirre vergihte wart
- Der lip der reinen megde zart
- Furbaz me verseret
- Ir tures bluot gereret
- 5Ir brivstel vnd ir lanke
- Und ir hut so blanke
- Wurden gar zerfuoret
- Unminneclich geruret
- Mit der krewel haggen
- 10Die hatten spitze zaggen
- Die si vaste wazten
- Ir kivschin lip zerkrazten
- Do sprach div maget here
- Nach ir herzin lere
- 15Ein lieht ist den rehten
- Ich meine gottis knehten
- Nv hie offen worden
- Und nach cristes orden
- Den div rehte herzin hant
- 20Vnd dem rehten bi gestant
- Ein frode der niht geliche
- Gein der elliv frode weiche
Empfohlene Zitierweise:
Hugo von Langenstein: Martina. Hg. von Adelbert von Keller. Stuttgart 1856, Seite 468. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0468.png&oldid=- (Version vom 18.8.2016)
Hugo von Langenstein: Martina. Hg. von Adelbert von Keller. Stuttgart 1856, Seite 468. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Hugo_Martina_1856_0468.png&oldid=- (Version vom 18.8.2016)
