Seite:Literarischer Verein Stuttgart IX 092.png

	Verschiedene: Bibliothek des Literarischen Vereins in Stuttgart (Band IX)

35.

So wol dir wip wie rein ein name.(H. 1, 181^a)

wie senfte er doch zerkennen vnd zenennen ist.
ez wart nie niht so lobesan.
swa dvz (Bl. 3^a) an rehte gv̊te kerist so dv bist.
din lop mit rede nieman vollenden kan.
swez dv mit trivwen phligest wol. der ist ein selic man.
vnd mac vil gerne leben.
dv gist alder welte hohen mv̊t. maht och mir ein wenic froide geben.

36.

Die hoch gemv̊ten zihent mich.(H. 1, 180^b)

ich minne niht so sere als ich gebare ein wip.
si liegent vnd vnerent sich.
si wc mir ie gelicher mazze so der lip.
nie getorste^[1] si dar vnder mir den mv̊t.
der vngnaden mv̊z ich. vnd des si mir noch tv̊t.
erbeiten als ich mac.
mir ist eteswenne wol gewesen gewinne aber ich nv niemer gv̊ten tac.

37.

Ich han ein dinc mit sorge geleit.(H. 1, 181^a)

vnd strite mit gedanken in dem herzen min.
obe ich ir hohen werdecheit
mit minem wolte lazen minre sin.
obe ich dc welle dc si grozer si.
vnd si vil selic wip. ste min. vnd aller manne vri.
div tv̊nt mir bede we.
in wurde ir lasters niemer vro. verget si mich dc clage ich iemer me.

38.

     Der lange sv̊zer kvmber min(H. 1, 181^a)

an miner herzelieber vrowen. der ist ernivwet
wie mohte ein wunder grozer sin.
dc min verlorn dienest mich so selten rivwet.
wan ich noch nie den boten gesach.
der mir ie brehte trost von ir wan leit vnd vngemach.
wie solt ich iemer dise vnselde erwenden.
vnmere ich ir dc ist mir leit.
si enwart mir nie so liep. kvnd iz volenden.

1. Lies getroste.

Empfohlene Zitierweise:
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 92. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_092.png&oldid=- (Version vom 7.1.2019)