Seite:Literarischer Verein Stuttgart IX 202.png

	Verschiedene: Bibliothek des Literarischen Vereins in Stuttgart (Band IX)

6.

Frowe ir^[1] hat vwer schone vnd vwer gv̊te(H. 1, 90^b)

svstens vil von herzen braht.
selic wip nv troste schiere min gemv̊te
alle tage vnd alle naht
so vergiz ich vwer niht
dar zv̊ wunsche ich dc dv͛ selde vch wol behv̊te
swaz so mir von vch geschiht.

7.

Mich enwil der lieben gv̊te niht erlazen

ich betrahte ir werdecheit.
sone kvme ich leider niender ir zemazen
si ist hohe vnd mir zebreit.
doch mac ich des niht verlan.
sin si iemer min geverte vf allen strazen
deich ir niht vergezzen kan.^[2]

8.

     Sol min sprechen sol min singen(H. 1, 306^a)

sol min langer dienest sol min stetecheit
niht ein liebez ende bringen.
ist dc alles ein verlornv͛ arbeit.
war sint danne hine verswunden
mine tage
han ich die gnade vunden
miner clage.

9.

Sich^[3] alse der tag so rich

werdecheit vnd eren ist dv͛ frowe min
ir lob ist so lobelich
dc si wol von schvlden mv̊z getivret sin.
danc habe si der werden mere
dv͛ sint gv̊t
dc si stille vnd offenbere
rehte tv̊t.^[4]

1. Lies mir.
2. Die Strophen 3–7 stehen in der Pariser Hs. zweimal: unter Neune und unter Rudolf von Rotenburg.
3. So, lies Rich.
4. Die Strophen 8. 9. stehen in der Pariser und Weingartner Hs. unter Leutolt von Seven.

Empfohlene Zitierweise:
Verschiedene: Bibliothek des Literarischen Vereins in Stuttgart (Band IX). Stuttgart, 1844, Seite 202. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Literarischer_Verein_Stuttgart_IX_202.png&oldid=- (Version vom 7.1.2019)