8 Nu aber leget alles von euch, den zorn, grym, boßheyt, lesterung, schandpare wort aus ewrem mund, 9 lieget nicht vnternander, zyhet den alten menschen mit seynen wercken aus, 10 vnd zyhet den newen an, der da vernewert wirt zu der erkentnis Gottis, nach dem ebenbild des, der yhn geschaffen hat, 11 da nicht ist, Krieche, Jude, beschneyttung, vorhaut, Vnkrieche, Schyta, knecht, freyer, sondern alles vnd ynn allen Christus.
12 So zyhet nu an, als die außerwelten Gottis heyligen vnd geliebten, hertzlichs erbarmen, freuntlickeyt, demutt, sanfftmut, langemut, 13 vnd haltet eyner dem andern zu gut, vnd vergebt euch vnternander, ßo yemand eyn klage hat widder den andern, gleych wie Christus euch vergeben hat, also auch yhr, 14 Vber das alles aber zyhet an die liebe, die da ist das band der volkomenheyt, [234] 15 vnnd der fride Gottis behalte die vberhand ynn ewrem hertzen, zu wilchem yhr auch beruffen seyt ynn eynem leybe, vnd seyt danckpar.
16 Last das wort Gottis ynn euch wonen reychlich, ynn aller weyßheyt, leret vnd vermanet euch selbs, mit psalmen vnd lobsengen vnd geystlichen lyden ynn der gnade, vnd singet dem herrn ynn ewren hertzen, 17 Vnd alles was yhr thutt mit wortten odder mit wercken, das thut alles ynn dem namen des herrn Jhesu, vnnd danckt Gott dem vater durch yhn.
18 Yhr weyber seyt vnterthan ewrn mennern, wie sichs gepurt ynn dem herrn. 19 Yhr menner liebet ewre weyber, vnd seyt nicht bitter gegen sie. 20 Yhr kinder seyt gehorsam den Elltern ynn allen dingen, denn das ist dem herrn gefellig. 21 Yhr veter zanckt euch nicht mit ewren kindern, auff das sie nicht kleynmutig werden. 22 Yhr knechte seyt gehorsam ynn allen dingen ewren leyplichen herrn, nicht mit dienst fur augen, als den menschen zugefallen, sondern mit eynfeltickeyt des hertzen vnd mit Gottis furcht, 23 Alles was yhr thutt, das thutt von hertzen, als dem herrn vnd nicht den menschen, 24 vnd wisset, das yhr von dem hern empfahen werdet die vergeltung des erbes, Denn yhr dienet dem herrn Christo, 25 Wer aber vnrecht thut, der wirt empfahen was er vnrecht than hat, vnd gilt keyn ansehen der person. (4, 1) Yhr herrn was recht vnd gleych ist, das beweyset den knechten, vnd wisset, das yhr auch eyn herrn habt ym hymel.
Halt an, an dem gepet, vnd wachet ynn dem selben mit dancksagung, 3 vnd betet zugleych auch fur uns, auff das Gott vns die thur des worts auffthu, zureden das geheymnis Christi (darumb ich auch gepunden byn, 4 auff das ich dasselbe offinbare) wie ich sol reden. 5 Wandelt ynn der weyßheyt gegen die draussen sind, vnd loset die zeyt. 6 Ewr rede sey alltzeyt ynn der gnade mit saltz gewyrtzet, das yhr wisset, wie yhr eynem yglichen antwortten solt.
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 316. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_322.jpg&oldid=- (Version vom 13.10.2016)
