Seite:Luther Das Newe Testament Deutzsch 434.jpg

	Martin Luther: Das Newe Testament Deutzsch

Das Siebentzehend Capitel.

¹ Vnd es kam eyner von den sieben engelln die die sieben schalen hatten, redet mitt myr vnnd sprach zu myr, kum, ich will dyr zeygen das vrteyl der grossen huren, die da auff vielen wassern sitzt, ² mit wilcher gehuret [XVII.]haben die konige auff erden, vnd truncken worden sind von dem weyn yhrer hurerey, die da wonen auff erden, ³ Vnd er bracht mich ym geyst ynn die wusten, Vnd ich sahe das weyb sitzen auff eynem rosynfarben thier, das war voll namen der lesterung, vnd hatte zehen horner, ⁴ vnd das weyb war bekleydet mit scharlacken vnd rosynfarb, vnd vberguldet mit gollt vnd edlen steynen vnd perlen, vnd hatte eyn gulden kilch ynn der hand voll grewels vnnd vnsawberkeyt yhrer hurerey, ⁵ vnd an yhrer styrn geschrieben den namen, das geheymnis, die grosse Babilon, die mutter der hurerey vnd aller grewel auff erden, ⁶ Vnd ich sahe das weyb truncken von dem blut der heyligen vnd von dem blut der zeugen Jhesu, vnd ich verwundert mich seer da ich sie sahe.

⁷ Vnd der Engell sprach zu myr, warumb verwunderstu dich? Jch will dyr sagen das geheymnis von dem weybe, vnnd von dem thier das sie tregt, vnd hat sieben hewbter vnd zehen horner, ⁸ Das thier das du gesehen hast, ist gewesen, vnd ist nicht, vnd wirt auff steygen vom abgrund, vnd wirt gehen yns verdamnis, vnd werden sich verwundern die auff erden wonen, der namen nicht geschrieben stehen ynn dem buch des lebens von anfang der wellt, wenn sie sehen das thier, das es geweßen ist, vnd nit ist, ⁹ Vnd hie ist der synn der die weyßheyt hatt.

Die sieben hewpter, sind sieben berge, auff wilchen das weyb sitzt, vnd sind sieben konige, ¹⁰ funff sind gefallen, vnd eyner ist, vnd der ander ist noch nicht komen, vnnd wenn er kompt, mus er eyn kleyne zeyt bleyben, ¹¹ Vnd das thier, das gewesen ist, vnd nicht ist, das ist der achte, vnd ist von den sieben, vnd gehet ynn das verdamnis, ¹² Vnd die zehen horner, die du gesehen hast, das sind die zehen konige, die das reich noch nicht empfangen haben, aber wie die konige, werden sie eyne stunde macht entpfangen nach dem thier, ¹³ dise haben eyne meynung, vnd werden yhre krafft vnd macht geben dem thier, ¹⁴ dise werden streytten mit dem lamb, vnnd das lamb wirt sie vberwinden, denn es ist eyn herr aller herren vnd eyn konig aller konige, vnnd mit yhm, die beruffene vnd außerweleten vnd glewbigen.

¹⁵ Vnd er sprach zu myr, die wasser, die du gesehen hast, da die hure sitzt, sind volcker vnd scharen, vnd heyden vnd zungen, ¹⁶ Vnd die zehen horner, die du gesehen hast auff dem thier, die werden die hure hassen vnnd werden sie wuest machen vnnd blos, vnnd werden yhr fleysch essen, vnd werden sie mit fewr verbrennen, ¹⁷ denn Gott hats yhn geben ynn yhr hertz, zu thun seyne meynung, vnd zu thun eynerley meynung, vnd zu geben das reich dem thier, bis das vollendet werden die wort Gottis, ¹⁸ Vnnd das weyb, das du gesehen hast, ist die grosse stad, die das reich hat vbir die konige auff erden.

Empfohlene Zitierweise:
Martin Luther: Das Newe Testament Deutzsch. [Melchior Lotther d. J. für Christian Döring und Lukas Cranach d. Ä.], Wittenberg 1522, Seite 428. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Luther_Das_Newe_Testament_Deutzsch_434.jpg&oldid=- (Version vom 6.10.2016)