gehet / auff der sich das Kärndterisch / oder Oesterreichisch Gebieth / scheidet / vnd das Venedische anfahet; dahin auch dieser Friaulische Ort allbereit gehörig seyn solle. Warumb Er aber allhie / in der Topographia Austriacarum Regionum eingebracht worden; davon ist der vorhin getruckte vnser Text / p. 101. zu lesen.
Ein zwar offene / aber schön / vnd wolerbaute Statt in Tyrol / so / wegen der 4. Jahrmärckte / die der Zeit am Montag / nach dem Sontag Oculi, den ersten Wercktag / nach dem Fronleichnamstag / den achten Septembris; vnd den Tag nach S. Andreas / sich anfahen / vnnd jeder 15. Tag lang wehren / berühmt ist; allda auch das Hoff-Gericht / wegen deß Etschlandes / alle Quartal gehalten wird / vnd allhie der Oesterreichische Lands-Hauptmann im Etschland deßgleichen seine Residentz hat. Sihe vnsern Text / p. 147. seq.
Ein Marckt in Ober-Oesterreich / zwo meilen von der Freystatt / vnnd ein meil von dem Marckt / vnd Schloß Schwertberg / gelegen / so vorhin Freyherrlich Zelkingisch gewesen; weme solches Pregarten jetzt zuständig seyn mag; davon hab ich keinen Bericht; aber wol von gemeltem Schwertberg / so vorhin Tschernemlisch gewesen / daß selbiger Ort dieser Zeit Herren Heinrich Wilhelmen / Herrn von Starenberg gehörig seye.
Ein Marckt-Fleck / vnd Berg / nahend Triest / vnd beym Meer gelegen / da die gute Reinfal / oder Prosegger Wein / wachsen / vnnd ein anders Prosegg / als das in Crain / ist. Die Alten haben es Pucinum geheissen. Jetzund gehört solcher Orth dem Hauß Oesterreich. Sihe vnsern Text / pag. 129. a.
Ein Ort in Kärnten / zwo meilen (dann also ist vnser Text / p. 101. zu corrigiren) von S. André im Laventhal / auff Völkelmarckt zu / gelegen.
Ein vestes Schloß in Vnter-Oesterreich / davon im Text / p. 57. in dem tomo 5. Theatri Europ. stehet / es hätte der Herr Obrist Vetter / An. 1645. den bey Ravenspurg (die Franckfurtische Relation hat Rabenspurg / vnnd meines erachtens / recht) gelegnen Flecken / selber / zuvor abgebrant; hernach sich auff discretion den Schwedischen ergeben müssen; die auch Stätz (Herrn Breinern gehörig) ein vestes Schloß / mit Kriegslist erobert; vnd hätten Sie / die Schwedischen / folgends das Hauptquartier zu Hohenau genommen: es hätten aber Anno 46. die Keyserischen Ravenspurg mit Accord wieder einbekommen. Vnd wird daselbst ferners gesagt / daß im gedachten 45. Jahr / die Schwedischen auch Niclasburg / Falkenstein / vnd das Hauß Wülferstorff / eingenommen hätten.
Ein Stättlein in Ober-Crain / oberhalb welchem das berühmte Wasser / die Sau oder Savus, entspringet. Gehört einem Graven von Thurn / so in der Burg allhie wohnet. Sihe den Text / p. 123 vnd daselbst auch vom Dorff / vnnd Schloß Feldes / oder Veldes / ins gemein Fels genant / dem Bisthum Brixen gehörig: Item / von dem See vnter solchem Schloß; auch der Insel / vnd Einsideley in solchem / so Wörth / oder bey Vnser lieben Frawen am See genant wird: Item / dem Gesundbad an diesem See.
Ein Stättlein / in Vnter-Steyer / an der Sau / da / über dem Wasser / das Land Crain liget. Ist ein Landsfürstlich Cammer-Gut; aber das Schloß / vnnd Herrschafft /
Matthäus Merian: Topographia Provinciarum Austriacarum. Frankfurter Kunstverein, Frankfurt am Mayn 1679, Seite 438. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:Topographia_Austriacarum_(Merian)_438.jpg&oldid=- (Version vom 1.8.2018)
_438.jpg&oldid=-){kind=link}
_438.jpg&oldid=3396364){kind=link}