Doctor Brants Narrenschiff/Der Weise

« Entschuldigung des Dichters	Sebastian Brant Doctor Brants Narrenschiff	Ende »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

Von narren hab ich vß geseyt
Do mit man doch wiß recht bescheydt
Wer witzig sy / gantz vmb / vnd vmb
Der la^eß myn fründ Virgilium /

Der wyß man

Eyn gu^ot vernunfftig / witzig / man
Des glich man nit mo^echt yenen han
In aller welt als Socrates
Appollo gab jm kuntschafft des /

5

Der selb syn eygen richter ist

Wo jm abgang / vnd wißheyt gebrist
Versu^ocht er vff eym na^eglin sich
Er acht nit / was der adel spricht
Oder des gemeynen volckes geschrey

10

Er ist rotund / gantz wie eyn ey

Do mit keyn fro^embder mackel blib
Der sich vff glattem weg anryb
Wie lang der tag jm krebs sich streckt
Wie lang die nacht den steynbock deckt

15

So gdenckt er / vnd wigt eben vß

Das jn keyn winckel jnn sym huß
Betru^eb / oder er red eyn wort
Das nit glich wa^eg vff alle ort /
Do mit nit fa^el das winckel ma^esß

20

Jo va^est syg / wes er sich verma^esß

Sunder all anlouff mit der handt
Versetz / vnd bald hab abgewant /
So ist jm nit so lieb dheyn schloff
Das er nit gdenck verr / vnd sich stroff

25

Was er den langen tag hab gthon

Wo übersehen er sich mag han /
Was er by zyt solt han betracht /
Vnd das zu^o vnzyt hab volbracht /
War vmb vollendet er hab die sach

30

On zymlicheyt / vnd all vrsach /

Vnd er vil zyt vnnütz vertrib
War vmb er vff dem anschlag blib
Den er woll mo^echt verbessert han /
Vnd nit den armen gesehen an

35

War vmb er jn sym gmu^et hat vil

Entpfunden schmertz / vnd wider will /
Vnd war vmb er diß hab gethon
Vnd hab jhens vnderwegen gelon /
War vmb er syg so offt geletzt

40

Vnd hab den nutz für ere gesetzt

Vnd sich verschuldt mit wort / vnd gschicht
Der erberkeyt geachtet nicht /
War vmb er der natur noch heng
Sin hertz zu^o zucht nit zyech / vnd zweng

45

Also bewa^ert er werck / vnd wort

Vom morgen / biß zu^o tages ort /
Gdenck all sachen die er du^ot
Verwürfft das bo^eß / vnd lobt das gu^ot
Das ist eyns rechten wisen mu^ot

50

Den jnn sym gdicht / vnß zeychet vß

Der hochgelobt Virgilius
Wer also lebet hie vff erd /
Der wer by gott on zwifel werdt
Das er recht wißheyt hett erkannt

55

Die jnn fu^ort jn das vatter landt

Das vnß gott geben well zu^o hant
Wünsch ich Sebastianus Brant

Deo gracias.