Doctor Brants Narrenschiff/Von undankbaren Freunden

« Von äffischen Narren	Sebastian Brant Doctor Brants Narrenschiff	Von Schriftverächtern »
fertig Fertig! Dieser Text wurde zweimal anhand der Quelle Korrektur gelesen. Die Schreibweise folgt dem Originaltext.
Für eine seitenweise Ansicht und den Vergleich mit den zugrundegelegten Scans, klicke bitte auf die entsprechende Seitenzahl (in eckigen Klammern).

[14v]

Wer vnrecht / gwalt / du^ot eynem man
Der jm nye leydes hat gethan
Do stossend sich sunst zehen an

Von worer fruntschafft

Der ist eyn narr / vnd gantz dorecht
Der eynem menschen du^ot vnrecht
Dann er dar durch gar manchem tro^ewt
Der sich dar nach syns vnglücks fro^ewt

[15r]

5

Wer synem fründt üt übels du^ot

Der all syn hoffnung / trüw / vnd mu^ot
Alleyn gesetzet hat vff jnn
Der ist ein narr vnd gantz on synn
Man fyndt der fründ / als Dauid was

10

Gantz keinen me / mit Jonathas

Als Patroclus vnd Achilles
Als Horestes vnd Pilades
Als Demades vnd Pythias
Oder der schiltknecht Saulis was

15

Als Scipio / vnd Lelius

Wo gelt gbrist do ist früntschafft vß
Keiner so lieb syn nechsten hat
Als dann jm gsatz geschriben stat
Der eygen nutz vertribt all recht

20

All früntschafft lieb sipschafft / geschlecht

Kein fyndt man Moysi jetz gelich
Der andre lieb hab / als selbst sich
Oder als was Neemias
Vnd der gotz vo^erchtig Thobias

25

Wem nit der gemein nutz ist als werd

Als eigen nutz des er begert
Den halt jch für eyn na^erschen gouch
Was gmeyn ist / das ist eygen ouch
Doch Cayn ist jn allem stat

30

Dem leid ist was glücks Abel hat

Früntschafft wann es gat an eyn not
Gant vier vnd zwentzig vff eyn lot
Vnd wel die besten meynen syn
Gant syben wol vff ein quitin