Doctor Brants Narrenschiff/Von unfolgsamen Kranken

Wer kranck ist / vnd lyt jn der nott
Vnd volget nit eynes artztes rott
Der hab den schaden / wie es got

von krancken die nit volgen.

Der ist eyn narr der nit verstat
Was jm eyn artzt jn no^eten rat
Vnd wie er recht halt syn dyget
Die jm der artzt gesetzet hett

Vnd er für wyn das wasser nymbt

Oder des glich das jm nit zymbt
Vnd lu^og das er syn lust er lab
Biß man jn hyn treit zu^o dem grab
Wer will der kranckheyt bald entgan

Der sol dem anfang widerstan

Dann artzeny mu^oß würcken langk
Wann kranckheyt vast nymbt vberhanck
Wer gern well werden bald gesund
Der zo^eug dem artzet recht die wund

Vnd lid sich / so man die vff brech

Oder mit meißlin dar jn stech
Oder sie hefft / wesch / oder bynd
Ob man jm schon die hut abschynd
Do mit alleyn das leben blyb

Vnd man die sel nit von jm tryb /

Eyn gu^otter artzt dar vmb nit flücht
Ob joch der kranck halber hyn zücht
Eyn siech sich billich lyden sol
Vff hoffnung / das jm bald werd wol /

Wer eym artzt jn der kranckheyt lügt

Vnd jn der bycht eyn priester drügt
Vnd vnwor seyt sym aduocat
Wann er will nemen by jm ratt
Der hatt jm selbß alleyn gelogen

Vnd mit sym schaden sich betrogen

Eyn narr ist / der eyn artzet su^ocht
Des wort / vnd ler / er nit geru^ocht
Vnd volget altter wiber rott
Vnd loßt sich segen jn den dott

Mitt kracter vnd mitt narren wurtz

Des nymbt er zu^o der hell eyn sturtz
Des abergloub ist yetz so vil
Do mit man gsuntheit su^ochen wil
Wann ich das als zu^o samen su^och

Ich macht wol druß eyn ketzerbu^och

Wer kranck ist der wer gern gesunt
Vnd acht nit wo die hilff har kunt
Den tu^efel ru^efft gar mancher an
Das er der kranckheit mo^echt entgan

Wann er von jm hilff wartend wer

Vnd nit mu^est sorgen gro^esser schwer
Der würd jnn narrheyt gantz verru^ocht
Wer wider gott gesuntheyt su^ocht
Vnd on die wore wißheyt gert

Das er well wyß syn vnd gelert

Der ist nitt gesunt / sunder gantz blo^ed /
Nit wiß / sunder jn torheyt schno^ed
In sta^eter kranckheit er verhartt
In vnsünn blintheyt gantz ernart /

Kranckheyt vß sünden dick entspringt

Die sünd vil grosser siechtag bringt
Dar vmb wer kranckheyt will entgan
Der soll gott wol vor ougen han
Lu^ogen das er der bicht sich noh

Ee er die artzney entpfoh

Vnd das die sel vor werd gesunt
Ee dann der liplich artzet kunt
Aber es spricht yetz mancher gouch
Was sich gelibt das geso^elt sich ouch

Doch wurd es sich zu^o lest so liben

Das weder lib noch sel wurt bliben
Vnd werdent ewig kranckheyt han
So wir der zytlich wend entgan
Vil synt yetz ful / vnd langest dott

Hetten sie vor gesu^ochet gott

Syn gnad erworben / hülff / vnd gunst
Ee dann sie su^ochten artzet kunst
Vnd meynten leben on syn gnad
Stu^erben doch mitt der selen schad /

Hett Machabeus sich verlon

Alleyn vff gott vnd nit vff Rom
Wie er zu^om ersten dett dar vor /
Er hett gelebt noch lange jor
Ezechias wer gestorben dott

Hett er sich nit geko^ert zu^o gott

Vnd dar vmb erworben / das gott wolt
Das er noch lenger leben solt
Hett sich Manasses nit bekert
Gott hett jn nyemer me erho^ert

Der herr zu^o dem bettrysen sprach

Der lange jor was gwesen schwach
Gang hyn / sünd nym / nit biß eyn narr
Das dir nit bo^esers widerfar /
Mancher gelobt jn kranckheyt vil

Wie er syn leben bessern wil

Dem spricht man / do der siech genaß
Do wart er bo^eser dann er was
Vnd meynt gott do mit btrogen han
Bald gond jn gro^esser plagen an