Eregernden ritter lat úch ſchǒwē

Eregernden ritter lat úch ſchǒwē·
vnder helmē dienen w̾den frowē·
welt ir die zit v̾triben·
ritterlich eren rich·
wert ir vō gv̊ten wibē·

IR ſvlt hohgemv̊te ſin vnd̾ ſchilde·
wol gezogen kv́ne blide milde·
tůt ritterſchaft mit ſinnē·
vn̄ ſint fro· mīnēt ho·
ſo mvgt ir lop gewinnē·

Denkent an der w̾den wibē gruͤſſē·
wie ſich dc kan gv̊ten frowen ſvͤſſē·
ſwen frowē mv̊t wol gruͤſſet·
d̾ iſt gew̾t· ſwes er gert·
ſin froͤide iſt im geſvͤſſet·

Swer mit ſchilden deken wil voꝛ ſchandē·
der ſol es dem libe vol^{[WS 1]} enblāden·
des ſchiltes ampt git ere·
im iſt bereit· w̾dekeit·
ſi mv̊s aber koſtē ſere·

Manlich h̾ze vindet man bi ſchilde·
zaglich mv̊t mv̊s ſin dem ſchilde wilde·
gegen wibē valſch der bleket·
ſw̾ in hat· an der ſtat·
da man mit ſchildē deket·

Tv̊ her ſchilt man ſol mich húte ſchǒwē·
dienen miner h̾zeliebē frowē·
ich mv̊ſ ir mīne erw̾ben·
vn̄ ir grůs· ob ich mv̊ſ·
gar in ir dieneſt ſterbē·

ICh wil ſi mit dieneſt bꝛingē inne·
dc ich ſi bc danne mich ſelbē mīne·
vf mir mv̊ſ ſper erkrachē·
nv̊ tůt her· mir dc ſper·
des twinget mich ir lachen·

Anmerkungen (Wikisource)

1. Vorlage: vō.