Han ich niht mit der nahtegal gesvngen
[173r]
Han ich niht mit der nahtegal gesvngen·
dú da húre ir svͤze stinme sang·
des hat mich ein vil suͤzú not betwungen·
dc dú welt mit vngemvͤte rang·
dú wil von ir truren scheiden niht·
noh von ir manigvalten sorgen·
so wolt ich vil gerne vf wibes gvͤte borgen·
was ob mir ir hoh trost geschiht·
Wie tůt dú reine lobes suͤze·
sol ich ir in senden sorgen leben·
swie ich doh diene vnd dienen mvͤze·
so mag si wol lieb nah leide geben·
des sol minne meisterinne sin·
dv́ kan vs truren froͤide machen·
wil ir dú zeherzen nahen minneklichen wachen·
so verkeret sich der kvmber min·
Bin ich vro dc kvmt von liebem wane·
der da wenet der weis niht war·
ich bin noch leider trostes von ir ane·
des ich niemer mich vertroͤste gar·
trůbet mir min minneklicher wan·
doh vroͤit mich dc in minem mv̊te·
dc si vil reine lobe selig wib vnd si vil gv̊te·
mine stete liebe erkennen kan·
Si mag mit wol die selben not erwenden·
vnd den kvmber den ich von ir trage·
wil si den mit ir gvͤte niht verenden·
so klage ich von schulden mine tage·
ist ir leit min lieb min lieb ir leit·
so wird ich selten vroͤidenriche·
doh dien ich ir iemer ob ir noh der hc entwiche·
dc si gedenke an mine stetekeit·