Ich tete gerne schin
[56r]
Ich tete gerne schin·
grôssen pin ·
den ich nv lange han·
wolde gelúke sin·
der venre min·
so mvͤse ich sorge lan·
swie mir dar an gelinge·
doch ratet dc ich singe·
ein wunneclicher mv̊t·
ǒch dvnket es mich gůt·
swer ere g̾ne iaget·
der gevat ir deste me·
des bin ich vnverzaget·
swies mir dar vmbe erge·
Ich bin ein selig man·
dc ich ie gewan·
Als schonen sin·
der mich geleren kan·
lâssen vnd han·
Als ich spil vnder in·
vnd ich wol kan gescheiden·
die lieben von den leiden·
das mein ich an ein wib·
vnd ir vil gv̊ten lip·
dú mir die froͤide machet·
der ich ê nien gepflag·
da von min herze lachet·
vil dike als es wol mag·
hohen mv̊t ich nien gewan·
ê ich die schonen ane gesach·
dú mir tv̊t dc ich wol kan·
verdulden leit vnd vngemach·
min herze nie von wibe me·
so rehte wol ze mir gesprach·
dc wolde ich wider reden ê·
do betwanc es mich dc ich ime veriach·
kvnde ich wol so solt ich sagen·
von ir dc beste als ichs entstan·
dv́ mir sol vil gar vertragen·
dc ich han den mv̊t an si verlan·
si hat berǒbet ellú wib·
an mir vnd mv̊s mich eine han·
Ja wage ich ere vnd ǒch den lib·
was mohte ich nv dvr si began·
Si kan nach eren·
wol verschulden·
lobes vil
den man ir tůt·
vnd ǒch bekeren·
nach ir hulden·
swen si will
si ist so gv̊t·
Wie moͤhte ich eine
si verlassen·
ane strit·
so dienet ir·
dc lant gemeine·
vnd vnverwassen·
zaller zit·
ist si von mir·
war tete ich danne minen sin·
der mich dc beste leret·
io erwurbe ich lihte den gewin[WS 1]·
der manig herze seret·
Si hat dv́ minne
zeineme gaste·
nv vil manigen tag gezalt·
dc si ir sinne
niht so vaste·
ziehen wil in ir gewalt·
als si die mine hat getan·
ǒch ist mir dc ein ere·
der ich wolde wesen ane·
húte vnd iemer mere·
Min herze ist grôs vnd wart nie swach·
dc es getorste ernenden·
Alsolhe swere· vnd vngemach·
dv́ mih tůt ellenden·
Ist min frowe ein teil ze her·
dvr wen solde ich dc wenden·
so wirt min froͤide deste mer·
wil si min not volenden·
der zwiuel tv̊t mir leides[WS 2] vil·
doch [56v] troͤstet mich gedinge·
ob ich bin stete· als ich da wil·
dc mir vil wol gelinge·
Ich sage iv wer den strit geriet·
dc taten mine sinne·
Ine mv̊t ir anders niet·
wan dc ich si minne·
so hat si mich gar gewert·
des ich an si sinne·
er ist vil wis swer mâsse gert·
des bin ich worden inne·
ich han mich selben vberladen·
mit wunderlicher stete·
buͤset nieman mir den schaden·
dc ziet sich ze vngerête·
wer solde stere
an wiben gelten·
wan ein vngefuͤger man·
der missetete·
vnd selten·
gv̊tes iht verschulden kan·
so schone sinne·
die gerieten·
das si kan des besten warn·
den sol dú minne·
dc verbieten·
das verbieten dc an mir niht missevarn·
Sol mih v́gan·
ir grôsse gvͤte·
die min ǒge an ir ersach·
so mv̊s ich lan·
ein hohgemvͤte·
dc ist mir ein vngemach·
des ich niht vergessen wil·
vnd lebt ich tvsent iare·
so het ich iemer leides vil·
dc sage ich iv zeware·
So gros ist min klage·
dc ich gar verzage·
sin enwelle ir wider sage·
lâssen dú mir alle tage·
vil zenahe gat·
si sol den rat·
kiesen der zen eren rehte stat·
sit si sich noch so wol behv̊tet hat·
vor missetat·
Swie sere mich twinge·
si von der ich singe·
doch han ich gv̊t gedinge·
dc mir noch wol gelinge·
wande ich wil den strit·
han alle zit·
vnz dc si der not ein ende git·
dú doch vil nahe zallen ziten lit·
mir iemer sit·
Sit si min gemvͤte·
gevie mit ir gvͤte·
nach der ich mich verwuͤte·
swie sere man ir huͤte·
Doch bin ich der man·
der ir wol kan·
verholne dienen ob si mir des gan·
was kan gewerren mime libe dan·
der mirs verban·
Dú minne·
mine sinne·
betwungen so hat·
dc min herze stât·
mit sorgen swies ergat·
Wie sol des werden rat·
es ist ein missetat·
dc si mich eine lat·
Mir were·
vil swere·
min mv̊t vnd krank·
wan dc si betwang·
min herze des ist lang·
dc ich nach froͤiden rank·
vnd ǒch vil dike sanc·
des sage ich ir danc·
Nvn ger ich niht mere·
wan dc dú schone mich ze rehte lere·
in der welte sol ichs iht began·
da von ich mvse haben wan·
dc si min genade welle han·
Swc ich nv von hohem mv̊te·
ie gesprach vnd ouch tet ze gv̊te·
daran brahte mich min frowe gv̊t·
davon min herze vnde al der mv̊t·
gerne zallen ziten dc beste tůt·
Swer gerne nach eren wil ringen·
der sol sinen mv̊t betwingen·
dc er selten an ihte missetv̊·
Ja mag im wol dar an gelingen·
kan ers mit schoner fůge bringen·
so wol beide abent vnd frů·
dc im die besten sprechent wol·
dc hilfet im darzv̊·
Er sol sin milte vnd niht ze here·
dc ist min tvmbes mannes lere·
wil er in der welte den pris beiagen·
svnder valsch er sine sinne kere·
daran dc er mit zúhten mere·
sin froͤide tǒgenliche sol er tragen·
ein lieb da von sin herze vro·
belibet zallen tagen·
Ja enmag ze stete
nieman tragen ho·
den mv̊t swie gerne ers tete·
noch rehte wesen vro·
wan der ze hohe minne hat·
gv̊ten wan des herze stat·
vor valscher fůre wol behv̊t·
dú minne twinget· sinen mv̊t·
dc er zallen tvgentlichen dingen mv̊s sin berelt·
des wirt sin lob von rehten schulden wit vnd breit·
Ein man sol niht vermiden·
durh boͤser lúte niden·
er si dien frowen zallen ziten vndertan·
vnd mv̊s er da von kvmber han·
den sol er gerne liden·
Mag er si bringen innen·
verwentlicher minnen·
vnd dc sin lib ist aller valscher sitte blos·
so mv̊s sin froͤide werden grôs·
swel leit er des gewinne·
Er lâsse ime sin der boͤsen nit· zelihter wis·
wc sol ein besser paradýs·
ob er mag vro beliben·
von wol gelopten wiben·
Ja klage ich min swere·
dc mir noch nie gelanc·
swie g̾ne ich da were·
da man nach froͤiden ranc·
Min herze ie gerne dc beste riet·
dem libe swies in doch niet·
veruahen kvnde vmbe ein har·
dv́ wort dv́ dvnkent mich niht war·
dc man sprichet dar nach man werbe· des werde meist dem man·
vnd ich so herzeclich ze manigen stvnden geworben han·
vmb einer frowen hvlde·
von der ich dike dulde·
Alsolich not dv́ mime libe nahe gât·
dc mich so kleine dc veruat·
dast ane mine schulde·
Ich diene vf gv̊t gedinge·
swie mir daran [57r] gelinge·
min herze ist ir mit trúwen zallen ziten bi·
vor leide wirt es niemer vri·
es si dc si mich twinge·
mit ir wolstenden ǒgen·
dc si mich sehe tǒgen·
an minneclich also· dc ich wol mvge entstan·
dc si min genade welle han·
so wirde ich ane lǒgen·
fro vnd zallen ziten schon vnd wol gemv̊t·
des hat si leider sich behv̊t·
dc si giht mit ir gvͤte
troͤste min vngemvͤte·
Ich wil der schonen kv́nden·
dc mir ist rehte als ê was gvrâsse·
der in des sewes únden·
ertranc da von das er ane mâsse·
minnet eine frǒwen dc si mich des erlâsse·
Des bitte ich inneklichen·
die gv̊ten dv́ mich hat so gebvnden·
dc in allen richen·
niemen lebt der so gar verwunden·
si von starken rúwen als ich bin zallen stvnden·
So sere nie bevangen·
enwart noch riter gawan von minnen·
ich si in ir getwangen·
noch vaster wolde si sich des versinnen·
so moͤhte ichs noch von ir vil svͤssen lon gewinnen·
Es ensi dc si mich welle·
begnaden so ist mir zallen ziten·
als eime der in der helle·
mv̊s mit rúwen gotes helfe biten·
ich stirbe ob ich zelang̾ vrist mit solher not sol striten·
Ob ich von ir eine·
verdirbe dc ist kleine·
wie lútzel mich des wundert·
ia langent tusent hvndert·
ze troie von elenen tot·
noch gerner mac man liden dvr mine frowen not·
wan got ein besser wib nie werden gebot·
Schoͤner lebt enkeine·
wan die ich dan meine·
in allen landen·
die si îe erkanden·
oder hant gesehen·
die mvͤssen ir alle von waren schulden iehen·
dc dem der si minnen sol niemer kan bas beschehen·
Si sagent von gútinnen·
die hie vor minnen·
pflagen zalten ziten·
in dien landen witen·
dc si weren schoͤne vnd gv̊t·
hete die got wol gesvnt vntz her behv̊t·
si en moͤhten gar gelichen niht der dú mich singen tv̊t·
Es wart nie niht so gv̊tes·
noh so hohes mv̊tes·
si kan mit schonen sinnen·
solich lop gewinnen·
dc ir die besten sprechent wol·
von schulden ir zeguͤte al dv́ werlt gedenken sol·
swa si wont da mv̊s dc lant von ir sin froͤiden vol·
dc ie so ho dc herze min·
gerîet an ein wib so gv̊t·
des mv̊s ich fro von schulden sin·
si hat vor valsche gar behv̊t·
ir vserwelten gv̊ten lip·
in schoner froͤide stet ir mv̊t·
gehoͤhet so fúr ellú wib·
das mime libe sanfte tůt·
Min gemv̊te·
tv̊t der merkere spehe
leides vil·
In getar vor hůte·
niemer si reht an gesehen·
als ich will
des sol ir gvͤte·
niemer mich engelten lan·
wan swa der lib·
ist min gemvͤte·
wirt ir selten an·
enchein ander wib·
enmag getroͤsten mir den mv̊t·
es ensi dc si mir sende
ein boten der mit worten gv̊t·
mir kv́nde ein liebes ende·
Elîes leit vil manigen tac·
voll liebe grôsse swere·
Klienor des selben pflac·
wie vngerne ich verbere·
ich endiende ir bas· ald alse wol·
der lib ist mir vnmere·
ob ich si dike miden sol·
bi der ich gerne were·
Ane kvmber moͤht es sin·
nv scheident vns die boͤsen·
die hvͤtent ir so tv̊nt si min·
got mvͤsse vns von in loͤsen·
Mir wc dú minne ein teil ze gram·
dv́ mich vil sere twinget·
do si mir die mâsse nam·
da mit vil maniger bringet·
sin gemvͤte an solhen wan·
da im vil wol gelinget·
si moͤhte michs han erlan·
min herze vnsanfte ringet·
nv han ich helfe noch den rat·
an den ich mich verlasse·
wan der gv̊ten dú mich hat·
betwungen ane mâsse·
hei wie si sich eret·
ob si min leit verkeret·
vnd mir die froͤide meret·
dú uil manig herze leret·
leben ane twanc·
vf svͤssen sanc·
der machet mengen man sin truren kranc·
ǒch tv̊n ich ir den ane valschen wanc·
vf gůten danc·
Nv seht wie ichs wâge·
ich seze ir zelâge
beide frúnden vnd mâge·
kvmt mir danne iht ze trage·
ir lon des wirte ich alt·
mir wart gezalt·
von der schonen ere manigvalt·
der han ich fvnden vil in ir gewalt·
des bin ich balt·
Nv enweis ich niht zware·
wie min frowe wil dc ich mich gebâre·
von der ich die grôssen not enpfie·
sin enwart mich noch ze rate nie·
nv tete ich g̾ne dc beste wisse ich wie·
Swc mir geschiht ze leide·
darvmbe ich niemer doch gescheide·
von der lieben minen steten mv̊t·
den sweren tag er wol vertůt·
der sich versiht dc der abent werde gv̊t·