Ich was in minnen· achte

Ich was in minnen· achte·
vnd ir gevangen gar·
bar· manger froͤiden kumber můst ich dulden·
e· mich ze sinnen brehte·
ir lieplich vmbevang·
dang· ir si dv́ mich komen liesse ze hulden·
ich solde· wolde· vrlop von waren schulden·
vúr bringen bas·
las bin ich· an den sinnen min·
fin ist der wille· koͤnd ichs ho ver gúlden·

Ob allem golde gimme·
ist ir vil werder lip·
nu noch niemer me wirt schoͤner funden·
ia ist als ich wolde· stimme
vnd ir vil werder grůs·
bůs ist mir sorgen bin ich drab enbunden·
ir lachen· machen heil kan sende wunden·
geil ich des bin·
sin· vnd der můt· mir flúget ho·
vro· heis ich mirst von liebe leide verswunde·

Ich gan ir vollen heiles·
sist so tugende rich·
glich· ir vf erden niender lebt der heren·
gar vmbe wollen· meiles
ist si svnder strit·
wit ist ir lop erschollen· ho in eren·
mit ringen· dingen mir kan wunne meren·
ir trutlich wort·
hort min hoͤchsten froͤiden wip^{[WS 1]}·
gib^{[WS 2]}· selken trost der sich niht kan verkeren·

Anmerkungen (Wikisource)

1. Vorlage: wipt.
2. Vorlage: gibt.