In disem núwen done

IN disem núwen done·
so wolde ich gerne núwe liedel singen·
wan dc mir dú wise an der kvnst ist zesnel·
nach eines wibes lone·
die sach ich an einem reigen springen·
der stet wol ir rise vnd ir snewizú kel·
si want sich alsam ein widegerte·
des nahtes were ich gerne ir schiltgeuerte·
ia ist ir da zeprise der lib sinewel·

Swie vil ich nv gesinge·
von reiner wibe minneklicher gvͤte·
des mich doh ir einú geniessen niht enlat·
vnd ich darnach ringe·
da ich mit ir hulde hohte min gemvͤte·
dc mich doh vil kleine veruangen noch hat·
we wie hanz ir also verkeret·
dc si den niht minnet der si eret·
vnd in aller eren mit trúwen gestat·

Habe ich niht gesvngen·
bi miner zit·
der frowen lob mit trúwen·
so si mir verteilet ir hulde vnd ir grůs·
ist mir niht gelvngen·
doch so wil mich frowen dienest niht rúwen·
wc ob lihte ir einú mir sorgen tůt bůs·
dú mir einem ist zetragenne swere·
wc dar vmbe bin ich ir vnmere·
in der dienst mir ab brah min bein vnd min vůs·