In ere bernder blvͤte (Mit aufgelösten Abbreviaturen)
[230r]
IN ere bernder blvͤte·
ich mine vrowen vant·
schoͤn vnd clar
die heren· tugende riche·
mit iemer wernder guͤte
si mich zir gebant
sag ich vn war·
dv́ selde mir entwiche·
got si bewar
mit willenklichem můte·
min wúnsch ist gar
das mir dv́ reine gůte·
noch fuͤg also das vro· min sin
sne vrî si· leide als ich da her gewesen bin·
wirt mir der trost von ir min sorg ist hin·
Heý froͤiden senderinne·
reine selig wip·
ein balsam smag·
mins libes vnd des herzen
dv trurens swenderinne·
sit din werder lip·
kan vnd mag
erwênden grossen smerzen
dv sorgen slag
verderberinne leides·
min liechter tag·
bedenke dich des eides·
der tǒgen mir· von dir geschach·
do ich dich seldenbere in sênden rúwen sach·
was lcher froͤiden mir da von zerbrach·
Was sol ein guͤtlich lachen·
mir mir ze manger stunt·
ir sênfter grůs·
sit si mich sus verderbet·
den kan so můtlich machen·
ir vil roter munt·
si tů mir bůs·
vil trurens vf mich erbet·
ei hercze tůs·
la dar din tumbes werben·
fúr war in můs·
ich sol bi ir ersterben·
ir lieplich blik· ir strik· mich hat·
ich spe· se· war ich welle niemer wirt min rât·
si troͤste mich an der min leben stat·