Min frowe ist vnderwilent hie

Min frowe ist vnderwilent hie·
so gůt ist si des wenne ich wol·
von ir geschiet ich mich noch nie·
vnd ist das ein minne die andern sv̊chen sol·
so wirt si dike ellende·
mit gedanken als ich bin·
min lib ist hie so wont bi ir min sin·
der wil von ir niht dc ist ein ende·
nv wolte ich er tete ir gůte war·
vnd min dar vmbe niht vergêsse·
nv was hilfet tůn ich dú ǒgen zv̊· so sehent si dvrh min herze dar·

Ich lebte wol vnd ane nît·
wan dvrh der lvgenere werdekeit·
dc wirt ein langer wernder strit·
ir lieb mv̊s iemer sin min leit·
es erbarmet mich vil sere·
dc si alse offenliche gant·
vnd niemen gv̊ter vnverworren lant·
vnstete schaden sv́nde vnere·
die ratent si iemer swa man si hoͤren wil·
owe dc man si niht vermidet·
dc wirt noch maniger frowen schade· vnd hat verderbet herren vil·