genandt werden. Daselbst herumb haben die Herren Truchsessen von Waldburg jhr Landschafft / welche sich dann weit erstreckt. Die Schlösser hierinn seynd: Zeyl / allda ein Hoffhaltung / Truchburg / Heinrichspurg / vnd Marstetten / welches letzte etwan ein Grafschafft genandt worden. Deß Fürstlichen Stiffts Kempten Gebiet erstreckt sich zu beyden Seiten der Iler / von der Rottach an / biß gar nahe an Kauffbeüren / vnd Memmingen / hinan: dessen fürnembste Pflegen seynd / Sultzberg / Hohenthan / Liebenthan / Westerrieden / Kemnat. Die andere Schlösser seynd Schwabelsberg / Wolkenberg / Wageck / Vnter-Thünga / Falck-Statt / vnd Herrschafft Mindelheim / so etwan den Hertzogen zu Teck zugehört / ist / durch Vbergebung der Freundtspergischen Erben / an das Hauß Bäyern kommen. Beyde Grafschafften Kirchberg / vnd Weissenhorn / seynd den Herren Fuggern zuständig / welche Herren noch darüber viel schöne Herrschafften / hin vnnd her zerstrewet / besitzen / vnder welchen / wegen der zierlichen / vnnd wolgebawten Pallästen / Kirchberg / vnnd Babenhausen / für die Fürnembsten zu halten. Die Marggrafschfft Burgaw / so bey dem Wässerlein Biber anfahet / ist dem Hauß Oesterreich zuständig / vnd gehört / sampt der Land-Vogtey / zu der innern Regierung zu Inßprugg. Ferner ligen in dieser Landschafft 7. ReichsStätt / deren mehrertheil auch Dörffer / vnd andere Landgüter / vnder sich haben. Von den innligenden Clöstern haben der mehrertheil ein gute Anzahl Dörffer / vnd Weiler. Die Ritterschafft besitzt auch viel schöner Herrschafften vnd Schlösser. Die Stammhäuser der noch lebenden Adenlich Geschlecht seynd hierinn; Freyberg / Langeneck / Werdenstein / Laubenberg / Hoheneck / Stain / Eroldsheim / Schwendi / Rott / Knöringen / Stotzingen. Ferner haben jnn / die Herren Marschallen zu Pappenheim / Rottenstein / Grünenbach / Kalden. Die Freyherren von Rechberg / Cronburg / Osterberg / Kelmüntz / Aichem. Die Freyherren von Freyberg / zu Eisenberg / NiderRona / Hürbel / Achstetten / Oepffingen. Die vom Stain / zu Stain / Ichenhausen / Yettingen / Stotzingen. Die Vehlin Freyherren / Dissen / Neuburg / Hohen-Ronaw. Die Freyherren von Bemelberg / Eroldsheim / vnd vom Hauß Oesterreich zu Pfandtschilling die Graffschafft Schälklingen. Die von Riedheim / Angelberg / vnd Harthausen. Die Schencken von Stauffenberg / Horn / vnd Rüßdissen. Die Schaden von Mittelbiberach / Warthausen / vnd OberSimatingen. Die von Muckenthal / Lautrach / vnd Altmanshofen. Die von Stotzingen / Delmesingen / Dischingen. Die von Horben / Ringenberg. Die von Welden / Laubheim. Die von Schellenberg / Landstrost. Die von Edelstetten / Beuren. Die Reichlin von Meldeck / Fehlheim / vnd Neydeck. Die Schertlin Burtenbach. Die Humpis / Siggen. Vnd also stund es vmbs Jahr 1619. am Ilerstrom / vnnd in der Gegendt desselben auff beyden Seiten; so der grössere Theil deß obern Schwabenlands / oder deß Algöws ist / dardurch mitten die besagte Iler laufft. Es hat sich aber seithero mit etlichen Orthen geändert; wie in disem vnserm Tractat an theils Stellen Bericht geschihet.
Ein Marcktfleck im Craichgöw / an dem Wasser Craich / welches an den Gräntzen deß Craichgöws / nit weit von dem Closter Maulbrunn / beym Sternfelsen / entspringt / vnd / vom Mittag / gegen dem Sommerlichen Abend / durchs Craichgöw rinnet / vnd / nach dem es bey dem Stättlein Gochsheim / vnd den Marcktflecken Müntzheim / Owesheim / Vbstat / etc. vorüber geflossen / endtlich vnderhalb Wersen / vnnd Hokena / so zwey Dörffer / sich in den Rhein ergiessen thut. David Chytraeus nennet in Orat. de Greichgaea, dieses Obesheim ein oppidum, so man für einen Marckt / vnnd Stättlein außlegt.
Ein vor dem nächsten Krieg gewestes reiches MönchsCloster / Benedictiner Ordens / 2. Meilen von Memmingen / gegen Bibrach / vnnd zwischen diesen beyden Reichs-Stätten / so 4. Meilen / wie Crusius lib. 10.
Matthäus Merian: Topographia Sueviae. Frankfurter Kunstverein, Frankfurt am Mayn 1643/1656 (Faksimilenachdruck 1925), Seite 145. Digitale Volltext-Ausgabe bei Wikisource, URL: https://de.wikisource.org/w/index.php?title=Seite:De_Merian_Sueviae_193.jpg&oldid=- (Version vom 31.7.2018)
