Sol von mīnenklichem wibe

Sol von mīnenklichem wibe·
mir vil ſenden man niht ſwere werdē bůs·
vō ir truͤtelehten libe·
wart mir nie wā dc ich nah ir ſuͤften mv̊s·
vō der ich den ſchaden han·
pfligt gegen mir niht ſteter trúwen
des wil ich an ir lachen mich niht mere lan·

Mir were doch das leben ſw̾e·
troſte mich ein anders liebes troͤſten niht·
wan ich weis dú inren mere·
dc die liben niemā wā in eren ſiht·
vꝛo mich doch ein troͤſten tůt·
lide ich not an meinem libe
mit gedulde· daſt mir an der ſele gůt·

Was ſol ich ir mere kúndē·
wan das ſi an den trúwē mich v̾derben lat·
ſi wil ſich an mir v̾ſúnden·
wiſſent dc es iemer vf ir ſele ſtat·
alles wandels iſt ſi vꝛi·
ſwie ſi mich an froͤiden irre·
got ſi mir als ich der herzelieben ſi·

 IR vil froͤlich ſtendē ǒgen·
dú hant ſo v̾ſeret mich vil ſenden man·
dc wil niemā mir gelǒben·
da iſt ǒch der vngetrúwe ſchuldig an·
dc iſt ir roſevarwer mvnt·
den ſi vf minen ſchaden ſpiſet·
der hat an dien gantzen trúwen mich v̾wunt·