Wol mich húte vnd iemer mere

Wol mich húte vnd iemer mere·
svmers vnd diner schonen zit·
zů der wunne han wir ere·
sit sin kvnft der welte froͤide git·
swem ie herzeliebe wart bekant·
der wirt in der wunne maniger froͤide ermant·
wan ich einer bin der noch nie trost an herzeliebe vant·

Froͤite mich ein liebes mere·
so wêr ich den svmer âne leit·
dc ǒch dú vil seldebere·
mich gewerte des si mir verseit·
so froͤite ich mich aller blv̊men schin·
vnd des svͤssen meien sang der vogellin·
der ist mir truͤbe sol ich von der lieben vngetroͤstet sin·

Rosen rot gar minneklich·
sost der lieben wengel vnd ir mvnt·
si ist so gar der eren rich·
dc ist mir ein seldericher vunt·
do bat si mich lâssen mînen sanc·
dc ich dar an erwunde sost min froͤide kranc·
sol min dienst vnd min singen gegen ir sin gar âne danc·

E das ich alsus erwinde·
so sol ein min frúnt der lieben sage·
sit ich gůt gerihte vinde·
so wil ich dem kv́nige von ir klagen·
dc si minen dienst nam vergv̊t·
vnd si mir dar vnder trost noch helfe tůt·
lât der kúnig dc vngerihtet so habe ich zem keiser mv̊t·

So fúrhte ich wir mvͤssen beide·
kempfen swie wir fúr gerihte komen·
wan si lǒgent bi dem eide·
dc si minen dienst habe genomen·
mv̊s ich danne vehten dast ein nôt·
kvme ich sluͤge ir wengel vnd ir mvnt so rot·
so ist ǒch laster sleht ein wib mich ane wer in kampfe tot·

Wiget der kúnig kv̊nrat dc ringe·
swenne ich kv́nde minú klagendú leit·
schier ichs vúr den keiser bringe·
da wirt doch niht wol von ir geseit·
swie mir der niht rihtet da zehant·
so wil ich zedem ivngen kúnige vs dúringen lant·
alder an den babest da man ie genade an rehte vant·

Lieber frúnt dú zúrnest sere·
dc dv keiser vnd kúnigen klagest·
vnd dem babste vf min ere·
dir ist besser das dv reht verdagest·
nim die minne dú gefuͤge si·
wis mir langer noch mit dinem dienste bi·
dir ist minne besser danne reht ich bin des mv̊tes fri·