Wol mich wol mich wol mich· des dc ich da han fvnden (Mit aufgelösten Abbreviaturen)

Wol mich wol mich wol mich· des dc ich da han fvnden·
vf der erde ein himelrich·
da von ist mir al min truren gar verswunden·
nie niht wart so wunnenklich·
da ist genaden also vil·
dc ich dar mit dienst iemer werben wil·

Miner frowen tvgenderiches herze ich meine·
dc ist so gar wandels fri·
vnd fúr war so rehte luterlichen reine·
dc im niht wont wan tvgende bi·
selden hort dar inne lit·
da ist manger froͤide hohgezit·

Wiblich zuht vnd wiplich guͤte sint dar inne·
kúsche trúwe stetekeit·
dar zv̊ wolgemv̊tes werdes wibes sinne·
an dc herze hat geleit·
got so minneklichen lip·
dc man si von warheit nennet wiplich wib·

Ja mv̊s iemer mich von schulden wol belangen·
in dc reine himelrich·
sit dc selbe svͤsse himelrich bevangen·
hat ein lip so minnenklich·
der nie wanndelmal gewan·
er ist kúsche schoͤne gv̊t lieplich getan·

Hie^{[WS 1]} niht wart so lieplich schoͤne in minen ǒgen·
als ir minneklicher lip·
si ist mir in dem herzen iemer svnder lǒgen·
lieber vil danne ellú wib·
si mac mir gelonen wol·
da von dien ich ir mit trúwen als ich sol·

Si ist des herzen vnd des libes min gewaltig·
darzv̊ alles des ich han·
so ist min trúwe gegen ir also manicvaltig·
dc ich ir bas gv̊tes gan·
danne mir selben dast also·
mich tůt ir gv̊t geberde ofte fro·

Schowet wi der huse an der tůnǒwe grunde·
lebt des trores suͤsse gar·
also lebe ich wol des luftes von ir mvnde·
endelichen miniv iar·
an ir stat minr froͤiden leben·
des hat si mir mit ir guͤte wunder geben·

Anmerkungen (Wikisource)

1. Vorlage: Mie.