Aber húget mir der mv̊t

Aber húget mir der mv̊t
zwar des meijet meijen blůt·
man sicht vf dem zwie·
bollen die sich wênt vf tv̊n·
dar in setzet sich dvr tv̊n·
nachtegal dv́ vri e·
geêret si dv́ kalle sin
dv́ des zwies hv̊te·
iemer mv̊s si selig sin·
dv́ da zv̊ den vogellin
setzet min gemuͤte·

Si hat engellichen schin·
wúnschent das si werde min·
das mir heiles gunne·
so hab ich ein paradýs·
hie vf erde in maniger wis·
si ist mins herzen wunne·
mit túren varwen zwo
ist ir lip bestrichen·
wis rot brvn gemischelt wol·
ist ir herze gar tugenden vol
vnd dv́ schant entwichen·

Zweier sternen hat gewalt
dv́ mich machet ivng vnd alt·
das sag ich din lv́ten·
dar in kan ich sehen wol·
was her nach beschehen sol·
vnd ǒch schon betúten·
kemm ich nach in ir gericht
hoͤrent froͤmdv́ mêre·
dis beschehen das beschicht·
da so bin ich anders nicht
ein wîssag gewere·