Dú heide· leide· ist worden bar man hoͤret da
[306v]
Dú[WS 1] heide· leide· ist worden bar man hoͤret da·
vil manigen svͤzen vogel sang·
vil kleide beide· gruͤn gel rot vnd bla·
der meie in git des hab er dank·
nv wil ein wib niht troͤsten mih·
swie der svnmer· manigen kvmber·
wenden kan· doch froͤit min herze selten sich·
Dv́ minne· sinne· vnd ǒch ein wib mir hat benomen·
da von ich mv̊s in sorgen leben·
dar inne· ich brinne· vnd sol mir niht zehelfe komen·
ein wib dv́ mir mag froͤide geben·
swie gar ich sten in ir gewalt·
wil dú reine· svͤze alleine·
dc ich ir hvlde ember in kurzen iaren wird ich alt·
Ein lachen· machen· kan ir svͤzes múndel rot·
dc es get dvrh dú ǒgen min·
der sachen· krachen· mv̊s dc herze min von not·
ich wande es were der svnnen schin·
swer mir des niht gelǒben wil·
der minne strale· vnd al ir kale·
mich tv̊t wunt· als si der senden wundet vil·
Anmerkungen (Wikisource)
- ↑ Vorlage: Der.