Das fro min mv̊t von herzen si

Das fro min mv̊t von herzen si·
des mvͤze dú vil werde selicliche leben·
dú mich von maniger sorge vri·
gemachet hat vnd ǒch vil lihten trost gegeben·
dc lieber trost nie manne von so reinem wibe kam·
do si mir alle vnfroͤide mit so steter froͤide nam·
Ich sage ú were es als ich han gesaget·
so moͤhte nv min endelosú klage wol sin verdaget·

Der werden wirde wirdet mich·
vf die si sich mit allen gv̊ten dingen wiget·
was lobe ich si lobt selbe sich·
da mit dc si stetekliche ir gvͤte pfliget·
ir selde seldet lib vnd ere· swem si wil·
dú selbe froͤit ein teil mich mere· danne vil·
Ich sage ú wer es als ich·
ich sage iv als ich han gesaget
so endarf noh úwer endelosú klage niht sin verdaget·^{[WS 1]}

Ir sprachet ie den frowen wol·
hab ich des iht genossen dc vergelte iv got·
vil gerne ǒch ichs gedienen sol·
wan so dc ich dar vmbe niht en si der werlte spot·
Ich gewan noh nie gegen iv dekeinen mv̊t·
mir ist anders lieb swer iv iht zeliebe tůt·
ich sage iv als ich han gesaget
so endarf noh úwer endelosú klage niht sin verdaget·

Anmerkungen (Wikisource)

1. Refrain nach Hagen hinzugefügt.