Der lange svͤsse kvmber min

Der lange svͤsse kvmber min
nach miner herzelieben frowen derst ernúwet·
wie moͤhte ein wunder groͤsser sin·
dc min verlorner dienst mich so selten rúwet·
vnd ich doch nie den botten gesach·
der mir nie brehte trost von ir wan leit vnd vngemach·
wie sol ich iemer dise vnselde erwenden·
vnmere ich ir das ist mir leit
si wart mir nie so lieb kvnde ichs verenden·

Wa nv getrúwer frúndes rat·
was tůn ich das mir liebet dc mir leiden solte·
min dienest spot erworben hat·
vnd anders niht wan ob ichs noch gelǒben wolte·
io wenne ich es nv gelǒben mv̊s·
des wirt ǒch niemer leides mir vnz an min ende bůs·
sit si mich hasset die ich von herzen minne·
mir kvndes nieman gesagen
nv bin ich sin vil vnsanfte worden inne·

Das si mich als vnwerden habe·
als si mir vor gebaret das gelǒbe ich niemer·
nv lasse ein teil ir zornes abe·
wan endelichen ir genade bitte ich iemer·
von ir enmac ich noch ensol·
so sich genůge ir liebes froͤwent so ist mir mit leide wol·
da enkan ich anders niht von ir gewinnen·
ê· das ich ane ir hulde si
so wil ich ir gvͤte vnd ir geberde minnen·

Owe das alle die nv lebent·
so rehte haben befunden wie mir ist nach einem wibe·
vnd das si mir den rat niht gebent·
dc ich getroͤstet wurde noch bi lebendem libe·
io klage ich niht min vngemach·
wan das den vngetrúwen ie bas danne mir geschach·
Die nie gewunnen leit von senender swere·
wolte got erkanden gvͤte wib ir svmelicher werben wie dem were·

Ein rede der lúte tůt mir we·
da enkan ich niht gedulteklichen zv̊ gebaren·
nv tůnt sis alle deste me·
si fragent mich ze vil von miner frowen iaren·
vnd sprechent welher tage si si·
dvr dc ich ir so lange bin gewesen mit trúwen bi·
si sprechent dc es moͤhte mich verdriessen·
nv la dc aller beste wib ir zuhteloser vrage mich geniessen·

Mac si mich doh lassen sehen·
ob ich ir were lieb wie si mich haben wolde·
sit mir niht anders mac geschehen·
so tv̊ geliche deme als es doch wesen solde·
vnd lege mich ir wol nahen bi·
vnd biete es eine wile als es von herzen si·
gevalle es danne vns beiden so si stête·
verliese aber ich ir hulde da so si verborgen als obe sis nie getête·