Der svmer hat den meien

Der svmer hat den meien·
froͤlich vúr gesant·
der sol froͤide heien·
vnd dc er si erkant·
wan er vertriben was·
ir kint ir sint niht las·
ir bruͤfent in er bringet úch blůmen vnd gras·
zwo brunen brâ·
die hant mich da·
verwundet sere vnd anderswa·

Swel frowe trurig were·
dú sol wesen frô·
ich sage ir guͤtú mere·
es meiet húre also
das aller frowen heil·
vf gat ein michel teil·
ir kint ir svnt mit froͤiden· iarlang wesen geil·
ein kel wis·
hat wol den pris·
si machet mich^{[WS 1]} an iugenden gris·

Nv wúnschent algemeine·
dc min leit zergê·
die ich mit trúwen meine·
dú tůt mir dike we·
dc ich ir werde erkant·
ir kvs der were ein pfant·
den ich vúr tusent marke neme so zehant·
ein vmbevanc·
mit armen blanc·
des wúnschent dem der den reigen sang·

Anmerkungen (Wikisource)

1. Vorlage: mich Mich.