Der wint̾ iſt zergāgē

Der wint̾ iſt zergāgē·
dc pꝛvͤfe ich vf der heide·
Al dar kan ich gegangē·
gůt wart min ǒgēweide·
Uon den blůmē wol getan·
wer ſach ie ſo ſchonē plan·
Der b̋ch ich zeinē kranze·
dē truͤg ich mit zhoie zv̊ den frowē an dē tanze·
Welle iemā w̾dē hohgemv̊t· d̾ hebe ſich vf die ſchāze·
Da ſtat viol vn̄ kle·
ſvmerlattē camandꝛe·
die w̾dē ziteloſē·
oſter cloien vant ich da· die liliē vn̄ die roſen·
Do wūſche ich daſ ich ſant min frowē ſolte koſen·
Si gab mir an ir dē pꝛis·
dc ich w̾e ir dulz amiſ·
mit dienſte diſen meiē·
dur ſi ſo wil ich reigē·
Ein foꝛes ſtůnt da nahē·
al dar begvnde ich gahē·
da hoꝛte ich mich enpfahen·
die vogel alſo ſv̊ſſe·
ſo wol dē ſelbē grůſſe·
Ich hoꝛte da wol zhantierē·
die nahtegal tǒbierē·
al da mv̊ſte ich parlierē·
zerehte wie mir w̾e·
ich was ane alle ſw̾e·
Ein rifiere ich da geſach·
dvrh dē foꝛes gieng ein bach·
zetal vb̾ ein planúre·
ich ſleich ir nach vnz ich ſi vant· die ſchone creatúre·
bi dē fontane ſas dú clare dv́ ſuͤſe vō fanúre·
Ir ǒgē lieht vn̄ wol geſtalt·
ſi was an ſpꝛúchen niht zebalt·
wan mehte ſi wol liden·
Ir mvnt iſt rot ir kele iſt blank·
ir har reit val zemâſſe lank·
gevar alſam die ſiden·
Solde ich voꝛ ir ligē tot· in mehte ir niht v̾midē·
Blank alſam ein hermelin·
warē ir dú ermelin·
ir ꝑſone dv́ wc ſmal·
wol geſchaffen vber al·
ein lúzel grande wc ſi da·
wol geſchaffen and̾ſwa·
an ir iſt niht v̾geſſen·
lindú diehel ſlehtú bein· ir fuͤſſe wol gemeſſē·
Schoner foꝛme ich nie geſach· dú min coꝛ hat beſeſſē·
An ir iſt ellú volle·
do ich die w̾dē ereſt ſach do hůb ſich min parolle·
Ich wart fro·
vn̄ ſpꝛach do·
frowe min·
ich bin din·
dv biſt min·
d̾ ſtrit d̾ mvͤſſe iem̾ ſin·
dv biſt mir voꝛ in allē·
iem̾ an dē h̾zen min·
mv̊ſt dv mir wol gevallē·
Swa mā frowē pꝛvͤuē ſol· da mv̊s ich vúr dich ſchallē·
an húbſch vn̄ ǒch an guͤte·
dv giſt aller ꝯtrate mir zhoie ein hohgemvͤte·
Ich ſpꝛach d̾ mīneklchē zů·
got vn̄ anders niemā tů·
d̾ dich behuͤtē mvͤſſe·
ir parol d̾ was ſvͤſſe·
Sa neic ich d̾ ſchonē do·
ich wart an minē libe vꝛo·
da vō ich ir ſaluierē·
ſi bat mich ir zhantierē·
vō der lindē eſtē·
vn̄ vō deſ meigen gleſtē·
da dú tauelrvnde wc·
da wir do ſchone warē·
dc wc lǒp dar vnd̾ gras
ſi kvnde wol gebarē·
Da wc niht mâſſenie me·
wan wir zwei doꝛt ī einē kle·
ſi leiſte dc ſi da ſolde·
vn̄ tet dc ich da wolde·
Ich tet ir vil ſanfte we·
Ich wúnſche dc es noch erge·
Ir zimt wol dc lachē·
do begv̄dē wir beide· do ein gemellichēſ machē·
daſ geſchach vō liebe vn̄ ǒch vō wūd̾lichē ſachē·
vō amv́re ſeit ich ir·
dc v̾galt ſi dulze mir·
ſi iach ſi litte es g̾ne· dc ich ir tete als mā dē frowē tůt doꝛt ī palerne·
dc da geſchach da denke ich an·
ſi wart mī trut vn̄ ich ir mā·
wol mich d̾ aventúre·
erſt iem̾ ſelig d̾ ſi ſiht·
ſit dc mā ir des beſtē giht·
ſiſt alſo gehúre·
ellú granze da geſchach· vō vns vf d̾ planúre·
Iſt iemē dē gelinge bc·
dc lâſſe ich ane has·
Si wc ſo hohes mv̊tes
dc ich v̾gas d̾ ſinne·
got lone ir alles gv̊tes·
ſo twīget mich ir mīne·
wc iſt dc ſi mir tůt·
allel gůt·
hohē mv̊t·
habe ich vō ir iemer·
in v̾giſſe ir niem̾·
Wol vf adelheit·
dv ſolt ſant mir ſin gemeit·
wol vf wol vf irmēgart·
dv mv̊ſt ab̾ an die vart·
dú da niht enſpꝛinget dú treit ein kint·
ſich froͤiwēt algemeine die dir ſint·
doꝛt hoͤꝛe ich die floͤitē wegē·
hie hoͤꝛe ich den ſvmb̾ regē·
Der vns helfe ſingē·
diſē reigen ſpꝛingē·
dē mvͤſſe wol gelingē·
zallen ſinē dingē·
Wa ſint nv die ivngen kint·
dc ſi bi vns niht enſint·
Soꝛ ie ſo· ſelig ſi min kúnigvnt·
ſolt ich ſi kúſſē tuſent ſtunt·
an ir vil roſe varwē mvnt·
ſo were ich iem̾ me geſvnt·
dú mir dc h̾ze hat v̾wūt·
vaſte vnz vf d̾ mīne grv̄t·
Der iſt enzwei·
Heia nv hei·
des fidellereſ ſeite der iſt enzwei·