Des leiden winters· vberlaſt

Des leiden winters· vberlaſt·
der ſi verwâſſen vn̄ ſin rǒb·
der hat enpherwet manegen aſt·
dem húre ſchoͤne ſtůnt ſin lǒp·
in hoher wirde gar gewalteklichen·
do můſte mangem h̾zen ſoꝛge entwichen·
dv́ nu betruͤbent ſint als· ê·
mirſt wirſ danne we·
nach der vil minneklichen·

Mich wundert· das ich in den herz·
min ſo rehte werde trage·
ein wib dv́ mir ſo mangen ſmerz·
fuͤget vn̄ ſende klage·
trut vrǒwe mines h̾zen keiſerinne·
got weis wol das ich dich vō h̾zen minne·
wilt dv mir lange ſin gehas·
ſo wiſſent das·
das es mir nimt die ſinne·

Es iſt ein iemer wernder rú·
dv́ mich vnd̾ gangen hat·
min leit iſt alle tage nú·
ſit ſo kleine mich vervat·
das ich ir eigen bin· vnd ir geſinde·
mich hilfet nicht min dieneſt her von kinde·
den ich ir willēkliche tet·
nu iſt min bet·
das mir ir troſt enbinde·