Die welt darf nieman zihen keiner missetat

Die welt darf nieman zihen keiner missetat·
si ist vnschuldig als ich úch bescheide·
si sprichet niemanne arges niht noh keine herzeleide·
si vrumt ǒch nieman in den eweclichen tot·
si stet al stille al si von erst ir schepher hies·
der si geschv̊f vnd alle creatúre·
si lat sich niessen wild vnd zam gehúre vnd vngehúre
dc ist ir reht sit er ir anders niht gebot·
dú welt ist ein spilbret das mv́get ir kiesen·
gewúrket wol mit listen gar
dc drinne ein man gewinnen^{[WS 1]} mag·
vnd drinne ǒch wol verliesen·
den werstein triffet nieman lege er iemer bar·

Dú tvgende lôse gitekeit·
tůt manger armen sele leit·
dú nieman kan erfúllen noch ergrv́nden·
si hat mit richen kv́ngen teil·
si wendet hoher fúrsten heil·
si fuͤret ǒch der grauen vil mit sv́nden·
si iagt ǒch in ir schanden bêrren·
dienst man zů vrijen herren·
phaffen hant ǒch mit ir phliht·
in kan v́ch gar ir frv́nde niht gezellen·
swarze kloster vnd dv́ wîssen·
went sich vf ir hulde flîssen·
vnd dv́ grâwen so man giht·
si wil ǒch mangen kǒfman tiefe vellen·
so enlatz ǒch der gebv̂r niht·

Anmerkungen (Wikisource)

1. Vorlage: verlieſen.