Dv́ milte dem adel wol an stat

Dv́ milte dem adel wol an stat·
dv́ milte wol bi gúlte zimt·
dú milte man megde vnd wib·
wol zieret vnd túret·
dv́ milte loͤschet missetat·
dú milte schanden vil benimt·
dv́ milte werdes herren lib·
mit hohem prise stúret·
dú milte reines herzen grunt·
mit maniger tvgent dvrflanzet vnd dvrzwiet·
dú milte vant der gaben vunt·
dv́ milte werdes lob mit riche vriet·
bis milte mensche sit dir hat·
die gotes milte also vndertan gemachet·
swc flúget flúzet swebt vnd gat·
dv̊st dv des niht din ere wirt geswachet·

Dv́ kerge ist hoher eren gram·
dv́ kerge tvgenden vil verirt·
dú kerge ist nides gitekeit·
ein vberflússig vas·
dv́ kerge winket svnder scham·
dv́ kerge sýmonie^{[WS 1]} birt·
dv́ kerge gegen der milte treit·
den iemerwernden has·
dv kerge ivgent vnd alter gris·
hoh vnd nider entwirdet vnd vneret·
...
...
dú kerge ist als vnreiner art·
vnd alse gar von gotes gvnst gewendet·
swc kerge in laster lange spart·
dc wirt snelle ofte lasterlich verswendet·

Nit^{[WS 2]} sv́nde stiftet ane zal·
nît wúrset wirs danne gift bekort·
nît loͤschet vride vnd weket zorn·
nît wendet manig gv̊t·
nît schv̊f des ersten engels val·
sich hv̊b dvr nit der erste mort·
dvr nit wirt meines vil gesworn·
nit vuͤget vbermv̊t·
bi nide lat sich valscher rat·
mit gitekeit vnd mit vntrúwe vinden·
rǒb vnd brant vnd manige vntat·
mit hasse wellent zv̊ nide^{[WS 3]} sich gesinden·
nit lies sich eine vinden nie·
nît stet geschart mit maniger hǒbetsv́nde·
nit pinet dort vnd krenket hie·
nit fuͤrt die nider in der helle grúnde·

Anmerkungen (Wikisource)

1. Vorlage: ſýmoīe.
2. Vorlage: Mit.
3. Vorlage: zwo megde.