Dv́ vil liebú sumer zit

Dv́ vil liebú sumer zit·
hat gelassen gar den strit·
dem vngeslahten winter lang·
ach ach kleinú vogellin·
mv̊ssen iarlang trurig sin·
geswigen ist ir suͤsser sang·
dc klag ich so klage ich mine swere
die mir tůt ein dirne seldenbere·
dc si mich niht zú zir vf den stroͤsak lat·
dc si mich niht zů zir vf den strǒsag lat·
vnd das si mirs doh geheissen hat·

Miner swere der ist vil·
ist das mir niht helfen wil·
ein minnenklichu dienerin·
sost min kvmber manigvalt·
armv̊t vnd der winter kalt·
die went mir iarlang heinlich sin·
armv̊t hat mich an ir besten rate·
dar an nemt mich wise lúte spate·
da von wil si mich niht vf ir strǒsak lan·
da von wil si mich niht vf ir stroͤsak lan·
vnd en han ir anders niht getan·

Frúnt ich han ú niht getan·
swas ich ú geheissen han·
des mag ich úch vil wol gewern·
ir gehiessent mir ein lin·
zwene schůhe vnd einen schrin·
des wil ich von ú niht enbern·
wirt mir dc so wende ich úwer swere·
swem dc leit ist dast mir alse mere·
so wil ich úch zv̊ mir vf den strǒsak lan·
so wil ich úch zů mir vf den strǒsac lan·
so mag er wol wiegelonde gan·

Herze trut min kúnigin·
sag an lieb was sol der schrin·
wilt dv ein salter vrowe wesen·
liessest dv die gabe an mich·
ich kǒfte etswas vber dich·
wie wilt den winter dv genesen·
dv maht dich vor armv̊t niht bedeken·
wan din gulter ist von alten seken·
da wil ich den strǒsak in die stuben tragen·
da wil ich den strǒsak in die stuben tragen·
so mv̊s oven vnd brugge erwagen·

Nv lan ich úchs alles wegen·
ist dc wir vns zemen legen·
so sint ir gewaltig min·
doh wil ich ê min geheis^{[WS 1]}·
bi mir haben gotteweis·
wan es mag niemer ê· gesin·
seht so nemt mih danne bi dem beine·
ir svnt niht erwinden ob ich weine·
ir sunt froͤlich zv̊ mir vf den strǒsak varn·
ir svnt froͤlich zv̊ mir vf den strǒsak varn·
so bit ich úch mich vil lúzel sparn·

Anmerkungen (Wikisource)

1. Vorlage: geheheis.